Во писмо до Фон дер Лајен: Шпанија предлага основање ЕУ центар за гаснење пожари за Западниот Медитеран во Мајорка

Шпанскиот премиер Педро Санчес изјави дека испратил писмо до претседателката на Европската комисија, Урсула фон дер Лајен, во кое предлага формирање на европски центар за одговор на шумски пожари за Западниот Медитеран во Мајорка.

„Местото избрано за создавање центар за одговор на шумски пожари во Западниот Медитеран, според нас и она што тој го претставува, треба да биде на островот Мајорка“, рече Санчес, сугерирајќи ја воздухопловната база Сон Сан Хуан како локација.

Санчес, исто така, рече дека Шпанија во моментов се бори со 10 шумски пожари со различен интензитет, вклучувајќи го и најновиот во северозападната покраина Замора, додека мерките за евакуација и ограничувањата за движење почнуваат да се укинуваат во делови од Авила и регионот на Мадрид.

Тој ја опиша ситуацијата како „критична“ и „многу сложена“, велејќи дека високите температури, ниската влажност и силните ветрови дозволуваат пожарите да се шират „експоненцијално побрзо од она што традиционално се смета за ширење на шумски пожари“.

Санчес ја повика јавноста да се потпре на официјални извори на информации.

„Ги молам граѓаните да се информираат преку официјални канали и проверени медиуми и да не обрнуваат внимание на дезинформации и лажни вести“, рече тој.

Тој додаде дека сите нивоа на власта, заедно со Националниот систем за цивилна заштита на Шпанија, ги користат „сите ресурси“ потребни за борба против шумските пожари, пренесе „Индекс“.