Собранието има право за закон да решава на кој начин ќе бидат доделувани пари на политичките партии за изборните кампањи. Со ова и со образложение дека веќе имало претходна судска одлука за истите оспорени одредби од Изборниот законик, уставните судии денеска ги отфрлија иницијативите на партиите Левица и Достоинство.
Со мнозинство гласови, 5 наспрема 3, Судот реши дека во сила и натаму остануваат одредбите од Изборниот законик кои на минатите парламентарни избори предизвикале партиите ЗНАМ и Левица да не можат да добијат државни пари за водење на изборни кампањи.
-Судиите застанаа на ставот дека тоа е веќе пресудена работа, „рес јудиката“ и дека одлуката која е донесена пред три години, кога одредбите ги оспори лидерот на Демократски сојуз Павле Трајанов, треба и сега да се донесе. Односно, дека Собраните има право да донесе законски одредби какви што донел во Изборниот законик. Јас имав поинаков став и издвоено мислење бидејќи сметам дека тоа не е во ред – изјави денеска Дарко Костадинов, претседател на Уставниот суд.
Тој објасни дека смета оти ваквите одредби предизвикуваат нефер и и ерамнорпавна изборна трка.
-Ова одлука не создава фер и рамноправни услови за партиите на изборите и тоа води кон прашањето кој е легитимитет на тој изборен резултат – праша Костадиновски.
Денеска судиите само гласаа за предметот бидејќи расправата беше завршена отпорано, а во меѓувреме се избра и осмиот член на Уставниот суд. На последната седница, кога Судот имаше седум судии, не можеше да се обезбеди мнозинство гласови на пет судии потребно за изгласување на соодветна одлука. Инаку, предлогот на судијата – известител Осман Кадриу беше да се поведе постапка за оценка на уставноста на одредбите од Изборниот законик кои се оспорени од партиите Левица и Демократи.
Со иницијативата на Левица пред Уставниот суд беа оспорени делови од Изборниот законик со ставот дека постојните правила за распределба на медиумскиот простор и на јавните средства за политичко рекламирање создаваат нееднаквост меѓу политичките субјекти. Во иницијативата е наведено дека одредбите од Изборниот законик овозможуваат привилегиран третман на најголемите партии, додека помалите партии и другите учесници во изборниот процес имаат ограничен пристап до медиумите и до ресурсите што се обезбедуваат за изборна кампања.
Подносителот смета дека Изборниот законик треба да обезбеди еднаков третман на сите регистрирани политички партии, без разлика дали се парламентарни или вонпарламентарни, бидејќи медиумската застапеност директно влијае врз видливоста на кандидатите и можноста граѓаните да се информираат за нивните програми. Во иницијативата се посочува дека во практиката одредбите се толкуваат така што најголем дел од времето во медиумите и од државната поддршка за политичко рекламирање добиваат двете најголеми партии од власта и двете најголеми партии од опозицијата.
– Во практиката произволно се толкува и двете најголеми партии од позицијата и од опозицијата добиваат најмногу време, на штета на другите помали партии. На овој начин, четирите најголеми партии – по две од власта и по две од опозицијата добиваат привилегиран пристап до медиумите и до државните средства, а другите парламентарни партии се наполно исклучени – се наведува во иницијативата на Левица.
Од Демократи тврдат дека ваквиот пристап е спротивен на уставните начела за политички плурализам, еднаквост на граѓаните и слободно политичко здружување. Според нив, оспорените одредби создаваат нерамноправна положба, бидејќи обезбедуваат 80 отсто од бесплатниот рекламен простор само за четири политички партии, додека другите учесници добиваат само 20 отсто од вкупниот простор за реклами и за билборди. (Б.Ѓ.)
