Трамп: Убиен е водачот на бандата „Трен де Арагва“

Американскиот претседател Доналд Трамп денес изјави дека наводниот водач на криминалната организација „Трен де Арагва“, Хектор Растенфорд Гереро Флорес, познат како Нињо Гереро, е убиен во американски воздушен напад во Венецуела.

Во објава на неговата социјална мрежа Truth Social, Трамп изјави дека американската јужна команда извршила „брз и смртоносен удар“, во операција која, според него, била спроведена во тесна координација со венецуелските власти.

„Како резултат на тоа, терористите од Трен де Арагва повеќе немаат безбедно засолниште во Венецуела или на кое било друго место, и под мое водство, ќе ги пронајдеме овие злобни убијци и водачи на нарко-картели во кое било време, на кое било место, и ќе ги испратиме во длабочините на пеколот каде што им е местото“, напиша Трамп.

Министерот за одбрана на САД, Пит Хегсет, изјави дека рацијата е извршена претходно оваа недела врз комплекс поврзан со бандата Трен де Арагва во Венецуела, објави „Си-би-ес“.

Министерството за комуникации на Венецуела потврди дека Гереро Флорес е убиен во заедничка операција на американските и венецуелските безбедносни сили насочена кон организираниот криминал во државата Боливија.

Според американските власти, Гереро Флорес бил баран бегалец кој минатата година беше обвинет во Њујорк за рекетирање, заговор за обезбедување материјална поддршка на терористи и трговија со кокаин.

Стејт департментот нудеше награда од 5 милиони долари за информации што доведоа до негово апсење.

Федералните обвинители тврдат дека Гереро Флорес ја водел „Трен де Арагва“ повеќе од една деценија, организација која од затворска банда прерасна во меѓународна криминална мрежа со присуство низ цела Америка.

Тој е обвинет за трговија со дрога и луѓе, изнуда и други сериозни кривични дела.

Гереро Флорес претходно отслужил повеќекратни казни во затворот Токорон во Венецуела, каде што обвинителите велат дека тој ги насочувал активностите на бандата.

Последен пат избегал во 2023 година и оттогаш е во бегство.

Операцијата доаѓа неколку месеци по промената на владата во Венецуела и соборувањето на поранешниот претседател Николас Мадуро, кој се соочува со обвиненија од американските обвинители за трговија со дрога и врски со криминални групи, вклучувајќи ја и „Трен де Арагва“.

Администрацијата на Трамп претходно ја означи „Трен де Арагва“ како странска терористичка организација и ги засили своите мерки против групата, за која вели дека претставува сериозна безбедносна закана за Соединетите Американски Држави.

Сепак, некои извештаи на американските разузнавачки служби ги оспорија тврдењата дека венецуелската влада директно ги насочува активностите на организацијата.