Трамп сериозно се закани: Иран ќе биде целосно уништен ако не попушти, НАТО не прави ништо

Претседателот на Соединетите Американски Држави, Доналд Трамп, денес изјави дека исходот од ултиматумот што му го испрати на Иран во врска со енергетските централи ќе биде „многу добар“, критикувајќи ги земјите од НАТО дека „не прават ништо“ и предупредувајќи го Техеран за „тотално уништување“.

Во интервју за израелскиот „Канал 13“, Трамп се осврна на војната со Иран и ултиматумот поврзан со енергетските капацитети на Исламската Република, наведувајќи дека последиците наскоро ќе бидат познати.

„Наскоро ќе видите што ќе се случи со ултиматумот за енергетските постројки, резултатот ќе биде многу добар“, рече Трамп, додавајќи дека ќе следи „тотално уништување на Иран“ и дека планот ќе „функционира одлично“, пренесе „Танјуг“.

Во исто време, тој упати остри критики до НАТО алијансата, наведувајќи дека Алијансата не направила доволно во однос на Иран.

„Земјите од НАТО не преземаат ништо, што е голема штета“, рече Трамп и додаде дека „Иран беше многу лош 47 години“ и дека сега „добива казна што ја заслужува“.

Порано денес, Иранската револуционерна гарда објави дека целосно ќе го затвори Ормутскиот теснец доколку Трамп ги спроведе своите закани за напад врз енергетските капацитети на Иран.

Во официјалното соопштение на Револуционерната гарда се наведува дека, во случај на американски напад, компаниите во регионот во кои САД имаат удел ќе бидат „целосно уништени“, како и дека енергетските постројки во земјите од регионот каде што има американски бази ќе станат „легитимни цели“ на иранските напади.

Тоа соопштение следеше откако Трамп се закани дека ќе ги „уништи“ енергетските капацитети на Исламската Република доколку Техеран не дозволи повторно отворање на теснецот во рок од 48 часа.

Соединетите Американски Држави и Израел го нападнаа Иран во сабота, на 28 февруари, во она што го нарекоа „превентивни напади“ што дојдоа по неуспехот на повеќе рунди преговори за нуклеарната програма на Иран.

Потоа Иран започна масовни одмазднички напади врз Израел и цели поврзани со САД низ регионот на Блискиот Исток.