Претседателот на САД, Доналд Трамп, пријавил повеќе од 600 милиони долари приход во 2024 година, вклучувајќи приходи од криптовалути, голф одморалишта, лиценцирани договори и други деловни активности, покажа неговиот последен јавен финансиски извештај.
Според годишниот финансиски извештај, Трамп пријавил средства во вредност од најмалку 1,6 милијарди долари, објави „Ројтерс“. Иако тврди дека неговите бизниси се во рацете на фонд управуван од неговите деца, приходите од овие извори сè уште се евидентираат на негово име, што предизвика нови критики и обвинувања за конфликт на интереси.
Голем дел од приходите на Трамп доаѓаат од инвестиции во дигитални средства.
Само криптовалутата „$TRUMP“, лансирана претходно оваа година, се проценува дека генерирала околу 320 милиони долари приход. Неговото семејство, исто така, заработило повеќе од 400 милиони долари преку партнерството со „Ворлд либерти фајненшл“ (World Liberty Financial), вклучувајќи 57,35 милиони долари од продажба на токени, и поседување на 15,75 милијарди управувачки токени.
Приходите од голф клубови претставуваат значаен дел од вкупните приходи. Трите голф-центри на Трамп во Флорида – Јупитер, Дорал и Вест Палм Бич – и неговиот приватен клуб, Мар-а-Лаго, генерирале најмалку 217,7 милиони долари.
Трамп, исто така, остварил меѓународни приходи, вклучувајќи 16 милиони долари од лиценцирани такси за проект во Дубаи, 10 милиони долари од развој во Индија, 5 милиони долари од договор во Виетнам. Приходите, исто така, вклучуваат авторски права, вклучувајќи 2,8 милиони долари од часовници на Трамп, 2,5 милиони долари од парфеми и патики, 1,3 милиони долари од објавувањето на Библијата Гринвуд и 1,16 милиони долари од дигитални картички на NFT со неговиот лик.
Првата дама Меланија Трамп пријавила приход од 216.700 долари од сопствената колекција на NFT.
Иако извештајот не го наведува точниот временски период што го опфаќа, податоците сугерираат дека е за календарската 2024 година.
