Трамп најави патување во Кина на средба со Си Џинпинг

Одреден е нов датум за патувањето на американскиот претседател Доналд Трамп во Пекинг на самит со кинескиот претседател Си Џинпинг на 14 и 15 мај, соопшти Белата куќа.

Доналд Трамп требаше да отпатува во Кина подоцна овој месец, но претходно објави дека го одложува патувањето за да може да биде во Вашингтон за да помогне во управувањето со американско-израелската војна со Иран.

Републиканскиот претседател сега објави нов датум за патувањето, дури и додека војната во Иран продолжува, а САД вршат притисок врз Техеран да го прифати предлогот за прекин на огнот.

Прес-секретарката на Белата куќа, Каролин Ливит, беше оптимистка кога новинарите ја прашаа дали новиот датум за патувањето на Трамп укажува дека војната во Иран би можела наскоро да заврши.

„Секогаш проценувавме четири до шест недели. Значи, можете да направите пресметка“, рече Ливит.

Патувањето во Кина беше планирано со месеци, но плановите почнаа да се распаѓаат кога Трамп изврши притисок врз Пекинг и другите светски сили да ја искористат својата воена моќ за да го заштитат Ормутскиот теснец, критичен пат за превоз на нафта.

Трамп минатата недела за време на состанокот со ирскиот премиер Мајкл Мартин во Белата куќа изјави дека ќе оди во Кина за пет до шест недели, наместо на крајот на месецот, и дека ќе ја „ресетира“ својата посета на Кина со кинескиот претседател Си.

„Соработуваме со Кина, тие се согласни со тоа. Се радувам на средбата со претседателот Си, а и тој се радува да ме види, мислам“, рече Трамп.

Посетата на Трамп на Кина се смета за шанса за изградба на кревко трговско примирје меѓу двете суперсили, но таа се заплетка во неговите напори да ја заврши војната во Иран, објавува АП.