„Ти благодариме, Трамп, што нè обедини“: Нови судири меѓу демонстрантите и полицијата во Тирана

Албанската полиција денеска во Тирана употреби водени топови и солзавец за да ги растера демонстрантите кои фрлаа јајца и шишиња кон полицајците, во една од низата демонстрации против проектот за луксузен комплекс на зетот на американскиот претседател Џаред Кушнер.

Судирите што избувнаа пред парламентот денеска не беа невообичаени во протестите што се одржуваат во Тирана веќе два месеци, наведе Ројтерс.

Демонстрантите тврдат дека проектот на Кушнер на јадранскиот брег е резултат на корупција и ќе ги загрози животните во заштитеното мочуриште, каде што Кушнер сака да изгради луксузни хотели вредни милијарди долари. Протестното движење е наречено „Фламинго револуција“, по птиците што живеат во областа.

Полицијата употреби водени топови против стотици демонстранти кои удираа по оградите околу зградата на парламентот и скандираа против американскиот претседател Доналд Трамп.

„Ти благодариме, Трамп, што нè обедини“, извикуваа демонстрантите.

Одморалиштето на Кушнер и другите развојни проекти на јадранскиот брег на Албанија се силно поддржани од албанскиот премиер Еди Рама, кој вели дека протестите не се вистински, туку се поттикнати од неговите политички противници.

Демонстрантите често изразуваат незадоволство од владата на Рама, која ја обвинуваат за корупција и кражба на државен имот.

Ројтерс неодамна објави дека албанските обвинители се сомневаат дека бизнисмен од Мајами, кој продал земјиште за одморалиштето на инвеститори поврзани со Кушнер, фалсификувал имотни листови.

Бизнисменот, кој е обвинет за перење пари од шверцери на кокаин, ги негира обвиненијата, а инвеститорите велат дека продажбата на земјиштето била легална.

Кушнер, кој се залага за план за одморалиште на недопрениот брег, вели дека ја открил локацијата со својата сопруга Иванка Трамп додека бил на јахта, објави Бета.

Сепак, тој не зборувал јавно за проектот откако избувнаа протестите на 23 мај. Инвеститорите потврдија дека Кушнер е инвеститор, но не ја прецизираа неговата улога или колку пари инвестирал.

Порано оваа година, избувнаа судири на протестот на кој се бараше оставка од заменик-претседателот на Рама, Белинда Балука, која ја обвинија за корупција. Балука оттогаш е сменета.