Затворени избирачките места во Србија: Ноќ на одлука – Александар Вучиќ или Студентите?

Денеска во Србија се одржаа вонредни парламентарни избори за пратеници во Народното собрание. Избирачките места беа затворени во 20 часот. Првичните проценки за резултатите се очекуваат вечерва, помеѓу 21:30 и 22:00 часот.

Голем број полицајци и полициски возила се наоѓаат на улиците во Белград. Сопствениците на угостителски објекти поставуваат заштитни панели на своите излози. Во градот владее голема тензија.

Неколку часа пред затворањето на избирачките места на вонредните парламентарни избори во Србија, во Пионерскиот парк во центарот на Белград повторно започна поставувањето шатори.

Паркот, кој за време на студентските протести беше наречен „Ќациленд“, останува ограден со метални бариери.

Според порталот „Машина“, на локацијата се забележани камиони кои донесуваат опрема, а во паркот се присутни и полициски службеници.

Кон крајот на денот, студентите изјавија дека „победата никогаш не била поблиску“.

Вишото јавно обвинителство во Белград соопшти дека надлежните институции соодветно ќе реагираат – во согласност со законот – на секој обид за нарушување на јавниот ред и мир, како и на секаков вид насилство, како на денот на изборите, така и во периодот што следи. Обвинителството апелираше до сите учесници во изборниот процес во Србија да ги намалат тензиите, да се воздржат од несоодветно или насилно однесување и да не избрзуваат со предвидувања за изборните резултати.

Милорад Додик, претседател на Сојузот на независни социјалдемократи (СНСД), на денот на изборите во Србија изјави дека соработката со Белград е клучна за Република Српска и ги повика граѓаните „да останат мирни“.

Во текот на денот, низ Србија беа забележани голем број неправилности и инциденти.

Напади, употреба на експлозивни направи и физички пресметки се главните вести во српските медиуми денес. Исто така, има извештаи и за повредени лица.

Според проекциите на „Ипсос“ и „ЦеСИД“ (CeSID), до 19:00 часот гласале 67,6 отсто од избирачкото тело.

На претходните избори, излезноста до 19:00 часот изнесувала 55,9 отсто. Прогнозите укажуваат дека конечната излезност би можела да достигне дури 70 отсто.

Вреди да се напомене дека рекордната излезност била забележана на 24 септември 2000 година и изнесувала 71,55 отсто – избори што резултираа со падот на режимот на Слободан Милошевиќ.

Осумнаесет изборни листи, со вкупно 2.418 кандидати, се натпреваруваа за 250 пратенички места, при што право на глас имаа 6.450.523 избирачи.

Меѓу 18-те изборни листи, девет ги претставуваат националните малцинства. На гласачкото ливче, меѓу другите, се наоѓаат листите: „Александар Вучиќ – Обединета Србија“, „Ивица Дачиќ – Фактор на стабилност“, „Студентска листа – Студентите победуваат“, „Расим Љајиќ – Човечки“, „Европска Србија – Мариника Тепиќ – Здравко Понош“, „Усаме Зукорлиќ – Движење за единство“, „СДА на Санџак – Чувари на Санџак“ и „Сојуз на војводинските Унгарци – д-р Балинт Пастор“…

За да освои пратеничко место, една листа мора да добие најмалку три отсто од гласовите, додека за изборните листи што ги претставуваат националните малцинства важи т.н. „природен праг“.

Неодамнешните предизборни анкети понудија различни проценки за односот на силите помеѓу листата предводена од актуелниот Александар Вучиќ и опозициската „Студентска листа“, а следствено на тоа, многу политички аналитичари очекуваат неизвесна трка – борба „за секој глас“.