Тензии воочи конклавата: Италијанскиот кардинал ја отвори душата – „сакаа да го свртат папата против мене“

Нови документи и аудио снимка се појавија во случајот со италијанскиот кардинал Џовани Анџело Бечу (76), кој се повлече од конклавата по бројни притисоци. Имено, во вторникот, емисијата Le Iene на италијанската ТВ мрежа Медиасет емитуваше прилог во кој се прикажува сложената позадина на целиот случај што доведе до судењето и пресудата против Бечу.

Беше емитуван разговор помеѓу Франческа Имаколате Чауки, поранешна членка на папската комисија, и Геновефа Цифери, некогашна советничка за безбедност на Италија, во врска со еден од главните сведоци во судскиот процес против Бечу, свештеникот Алберто Перласко.

Аудио снимките од прилогот се дел од досието што финансискиот посредник Рафаел Минционе го испратил во жалба до Обединетите нации ден претходно, пишува италијанскиот весник Il Messaggero.

Наводно, на снимката се гледа како припадник на жандармеријата на Ватикан и кажува на една жена по име „Франческа“ како да му наложи на монсињор Перласка да сведочи на судењето за финансиски малверзации во Државниот секретаријат на Светата столица.

„Овие разговори го потврдуваат моето верување дека имало луѓе кои се обиделе да го свртат папата против мене, кои се обиделе да го измамат папата“, рече кардиналот Бечу во гостувањето во емисијата.

Бечу, пак, одлучи да не учествува на конклавата што почнува следната среда.

„Имајќи го при срце доброто на Црквата, на која и служев и ќе продолжам да и служам со верност и љубов, како и придонесувајќи за единството и спокојството на конклавата, решив да ја послушам, како што секогаш правев, волјата на папата Франциск да не влегувам во конклавата, а во исто време да останам убеден во мојата невиност“, истакна во соопштение кардиналот Бечу.

Бечу беше еден од осомничените во истрагата за контроверзното купување на недвижен имот во Лондон, кое подоцна се прошири на Обединетите Арапски Емирати, Велика Британија, островите Џерси, Луксембург, Словенија и Швајцарија. Станува збор за купување на поранешната зграда „Хародс“ во Кенсингтон, Лондон, која Ватикан ја купи и ја претстави како „одлична инвестиција“ за 300 милиони фунти.

Судењето, кое траеше две години, се вртеше околу луксузната вила во лондонскиот кварт Челзи, која е купена со црковни пари, а за имотот, провизиите и другите услуги наводно биле платени неколку стотици милиони евра.

Ватикан кон крајот на 2023 година го прогласи за виновен по три точки од обвинението за проневера и го осуди на пет години и шест месеци затвор, со трајна забрана за вршење јавна функција и парична казна од осум илјади евра. Папата Франциск му ги одзеде правата и привилегиите на кардиналот во 2020 година, но Бечу ја задржа титулата.

Целиот случај ја разоткри финансиската дисфункција на Ватикан и покажа дека папата Франциск сака да го поправи лошото управување со финансиите на Светата столица.

Скандал во Ватикан: Кардинал се повлече од конклавата, откриено е дека е осуден на затворска казна