„Епл“ (Apple) денеска се соочи со прекини во работата на неколку свои дигитални услуги, што се надоврзува на низата технички проблеми што неодамна ги погодија големите компании, банки и авиокомпании во Соединетите Држави.
Корисниците на Apple пријавија потешкотии при најавување на iCloud, преземање апликации и користење на Apple Pay. Според Yahoo Finance, страницата на компанијата за статус на системите покажала проблеми со најавувањето на iCloud, а биле забележани потешкотии и кај други услуги.
Во вторникот, акциите на Apple паднаа за помалку од еден отсто – пад што е малку помал од оној на индексот S&P 500, кој се намали за околу еден отсто.
Прекините во услугите на Apple доаѓаат по серија слични инциденти. Минатата недела, глобален прекин ги погоди услугите на Microsoft, вклучувајќи ги Outlook и Teams, додека во понеделникот, клиенти на неколку големи американски банки пријавија потешкотии при пристапот до своите сметки и вршењето трансакции.
Проблемите ги зафатија JPMorgan Chase, Bank of America и Wells Fargo; исто така, беа пријавени прекини и кај услугата за трансфер на пари Zelle. Од JPMorgan изјавија дека причината била софтверска грешка во внатрешните хардверски системи, нагласувајќи дека нема докази за сајбер-напад.
NOW: Apple is experiencing MAJOR outages across numerous services. Apple confirms iCloud sign-in problems affecting ALL users, plus outages for the App Store and Apple Music.
Users are also reporting Apple Pay problems.
It's the LATEST in a string of outages hitting the FAA,… pic.twitter.com/4gTUQiW7uV
— RedWave Press (@RedWavePress) November 17, 2026
Акциите на големите банки во понеделникот и вторникот паднаа за приближно еден до два отсто, додека вредноста на акциите на JPMorgan оваа недела се намали за речиси пет отсто.
Ниту авиоиндустријата не беше поштедена од овие проблеми. United Airlines во понеделникот привремено ги запре полетувањата поради техничка грешка, додека неколку дена претходно, системски проблем во Федералната управа за авијација на САД (FAA) предизвика приземјување на авионите низ целата земја.
Компаниите што ги открија причините за прекините воглавно ги припишаа на технички проблеми, како што се софтверски грешки и промени во мрежната инфраструктура. Сепак, во моментот на објавување на извештајот, Apple сè уште немаше наведено конкретна причина за прекините во своите услуги.
Според достапните информации, нема потврда дека овие инциденти се поврзани или дека се резултат на координирани сајбер-напади.












