Техеран планира да ја пренесе војната во Европа, цел е и наша соседна земја

Според извори запознаени со иранските кругови за донесување одлуки, Техеран ја разгледува можноста за напад врз американските воени објекти во Југоисточна Европа, вклучувајќи ја и Бугарија, пишува „Фајненшел тајмс“. Особено загрижува процената на еден од изворите на весникот дека иранскиот напад врз американската база во Јордан минатиот месец, кој бил најточниот напад со долг дострел што Иран го извршил досега, би можел да биде еден вид порака до Европа

Во случај на нова американска ескалација, Иран би можел да го прошири конфликтот далеку надвор од Блискиот Исток и да ги загрози американските воени интереси во Европа. Според извори запознаени со иранските кругови за донесување одлуки, Техеран ја разгледува можноста за напад врз американските воени објекти во Југоисточна Европа.

Според информациите на „Фајненшел тајмс“, Техеран ја разгледува можноста за напад врз американските воени објекти во Европа ако претседателот Доналд Трамп одлучи директно да ја нападне иранската инфраструктура. Два извори запознаени со иранските кругови за донесување одлуки изјавија за „Фајненшел тајмс“ дека иранските сили ја проценуваат можноста за напад на американски воени објекти во земјите од Југоисточна Европа, вклучувајќи ја и Бугарија. Минатиот месец, Софија се согласи да дозволи користење на воздухопловната база Безмер за полнење гориво на американските авиони.

Европските земји кои имаат американски воени капацитети на своја територија би можеле да станат дел од директен безбедносен ризик. Вашингтон претходно го обвини Техеран за лансирање неколку ракети кон заедничката американско-британска воена база Диего Гарсија во Индискиот Океан, на околу 4.000 километри од Иран. Според САД, ракетите не ја погодиле целта. Во исто време, Иран веќе ја демонстрираше способноста за извршување напади со долг дострел. Во март, Турција објави дека системите за воздушна одбрана на НАТО пресретнале неколку балистички ракети лансирани од Иран. Во истиот месец, британската воздухопловна база Акротири на Кипар беше цел на напад со беспилотни летала. Западните претставници во тоа време изразија сомнеж дека дронот е од иранско потекло, но изјавија дека, најверојатно, не е лансиран директно од иранските сили, туку од една од групите поврзани со Техеран во регионот.

Особено загрижувачка е процената на еден од изворите дека иранскиот напад врз американската база во Јордан минатиот месец, во кој загинаа тројца американски војници, бил најточниот напад со долг дострел што Иран го извршил досега. Според истиот извор, тој напад можел да биде еден вид порака до Европа.

– Пораката до Европа е дека може да биде цел на ракета и затоа треба да разбере каде се наоѓа во оваа војна, рече изворот на „Фајненшел тајмс“.

Уште посериозно звучи неговото предупредување дека погрешна процена би можела директно да ја прошири војната на европскиот континент.

Изворите на весникот посочуваат дека природата на одговорот на Иран ќе зависи првенствено од следните потези на Вашингтон, при што еден извор тврди дека иранскиот режим подготвува план за ескалација ако Трамп ги исполни претходните закани и нареди напади врз иранската инфраструктура, а друг порачува дека Иран, во случај на директен напад од САД, „нема да поставува никакви ограничувања на својот одговор“. Притоа, Кипар би можел да биде меѓу потенцијалните цели на иранска одмазда.

Американските бази, логистичките центри и инфраструктурата во европските земји би можеле да се претворат во потенцијални цели, додека земјите домаќини истовремено би биле изложени на ризик од ирански одговори. Ова би отворило исклучително тешко прашање за европските сојузници на Вашингтон: дали можат да останат надвор од војната ако американската воена инфраструктура на нивна територија е на списокот на цели на Иран? Со таков потег, Иран би се обидел да ја промени самата логика на конфликтот. Токму затоа, заканата од ширење на конфликтот во Европа е можеби поопасна од поединечен напад. Една ракета или дрон насочен кон американски објект во европска земја би можел да предизвика синџир на одмазда во кој границата помеѓу Блискиот Исток и европскиот конфликт би била многу брзо избришана. Доколку Вашингтон и Техеран продолжат по патот на ескалација, Европа би можела да стане не само набљудувач на војната туку и нејзин следен фронт.