СЗО: Ситуацијата со хантавирусот не е споредлива со пандемијата на Ковид

Генералниот директор на Светската здравствена организација (СЗО), Тедрос Аданом Гебрејесус, денес им рече на граѓаните на Тенерифе дека ризикот за јавно здравје од хантавирусот е низок и најави дека лично ќе го посети островот за да ја надгледува операцијата за грижа за патниците од бродот MV Hondius.

Во директно обраќање до луѓето на Тенерифе, Тедрос нагласи дека моменталната ситуација со хантавирусот (сојот на Андите) не е споредлива со пандемијата на COVID, и покрај фактот дека три лица на бродот починаа.

„Ризикот за вас, во вашиот секојдневен живот на Тенерифе, е низок. Тоа е проценка на СЗО и ние не го правиме тоа лесно“, нагласи шефот на СЗО, додавајќи дека во моментов нема симптоматски патници на бродот.

Тедрос објасни дека шпанските власти подготвиле детален план според кој патниците ќе бидат префрлени во индустриското пристаниште Гранадиља, далеку од станбените области, а потоа директно репатрирани во нивните матични земји без контакт со локалното население.

Тој му изрази благодарност на шпанскиот премиер Педро Санчез за неговата одлука да го прифати бродот со речиси 150 луѓе од 23 земји, опишувајќи го како чин на солидарност и морална должност во согласност со Меѓународните здравствени прописи.

„Тенерифе беше избрана затоа што има медицински капацитет, инфраструктура и хуманост потребни за да им помогне на овие луѓе. Вирусот не познава политика ниту граници, а нашата најдобра имунолошка одбрана е солидарноста“, рече Тедрос.

Генералниот директор на СЗО го најави своето пристигнување на островот за да ги поддржи здравствените работници и персоналот на пристаништето, нагласувајќи дека хуманоста што ја покажале заслужува лично признание, а не само пофалби од далеку, пренесе „Бета“.