Сведок слушнал истрел и ги видел како си заминуваат: Тројца осомничени за убиството на Бинев фатени со два пиштола

Бугарскиот бизнисмен и поранешен европски шампион во теквондо, Славчо Бинев, беше убиен во саботата во својот дом во софиската населба Павлово. Пукањето го пријавил работник кој се наоѓал на имотот, а по пристигнувањето, медицинските екипи можеле само да констатираат смрт.

Според извештаите на бугарските медиуми, службите за итни случаи биле известени во 10:28 часот. Екипа на брза помош пристигнала на местото на настанот за седум минути, но ништо не можело да се стори за да се спаси Бинев.

Според бугарските медиуми, на имотот пристигнале лица кои го познавале Бинев, а оваа средба ѝ претходела на пукањето. Полицијата пронашла испукана чаура на местото на злосторството, додека Бинев се здобил со прострелна рана во главата.

По убиството, започнала потрага по осомничените. Тројца мажи биле пресретнати на 54-тиот километар од автопатот „Тракија“, во близина на тунелот „Трајанова порта“. Бугарските медиуми објавија дека кај нив биле пронајдени два пиштоли; тие се испратени на форензичка анализа за да се утврди дали се поврзани со убиството.

Истражителите ја разгледуваат можноста злосторството да е поврзано со финансиски спорови. Повикувајќи се на полициски службеници, бугарските медиуми пренесоа дека мажите го познавале Бинев и претходно го посетувале во неговиот дом. Сепак, мотивот за убиството сè уште не е официјално утврден.

Бинев беше добро познат и по својата спортска и по својата политичка кариера. Во 1992 година стана европски шампион во теквондо, а подоцна извршуваше раководни функции во бугарските спортски организации. Во политичката сфера, тој беше пратеник во Европскиот парламент, а подоцна и пратеник во бугарскиот национален парламент.