Американскиот претседател Доналд Трамп побара од украинскиот претседател Володимир Зеленски да ги запре украинските напади врз руската инфраструктура за производство на дизел.
Ова сосема неочекувано барање беше проследено со тврдењето дека таквите напади придонесуваат кон глобален недостиг на дизел, додека неговата војна против Иран го попречува снабдувањето со гориво ширум светот, пренесува „Киев индепендент“ (The Kyiv Independent).
Овие изјави го одразуваат настојувањето на Трамп да ги ограничи украинските напади врз рускиот енергетски сектор во време кога глобалните пазари на гориво се соочуваат со сè поголеми прекини во снабдувањето, поврзани со војната на САД против Иран.
„Г-дин Зеленски мора да направи една работа. Мора да престане да ги уништува капацитетите за дизел гориво во Русија“, рече Трамп, додавајќи:
„Нека напаѓа цели, но не и капацитети за дизел гориво, бидејќи тоа предизвикува недостиг на дизел. Разговаравме со г-дин Зеленски за ова… Ова не е последица на случувањата на Блискиот Исток.“
Војната на Трамп против Иран доведе до исфрлање од функција на повеќе од 20 проценти од капацитетите за преработка на нафта на Блискиот Исток и практично го затвори Ормускиот теснец, низ кој претходно минуваше приближно една петтина од светските залихи на нафта.
Украина продолжува да ја напаѓа руската нафтена инфраструктура како дел од пошироките напори за попречување на снабдувањето со гориво и намалување на приходите што Москва ги користи за финансирање на војната против Украина.
На 13 септември, украинските сили извршија напади врз рафинерии за нафта во рускиот Краснодарски крај и во Република Татарстан, соопшти Генералштабот на Украина.
Барањето на Трамп упатено до Зеленски беше изнесено од Ирска, каде што Трамп престојува во дводневна посета.
