Американскиот весник „Волстрит џурнал“, повикувајќи се на извори блиски до двојката, наведува дека Канг Веи и Џенсен Хуанг се познаваат околу една деценија. Тие се запознале преку деловни врски во технолошката индустрија; едно од лицата кои помогнале во нивното запознавање тврди дека средбата се случила во Азија, пренесува „Нова“.
Инвестициската фирма на Канг, „Хекси“ (Hexi), инвестирала во бројни технолошки компании, вклучително и во такви што се занимаваат со развој на видеоигри. Преку овие инвестиции, кинескиот бизнисмен во текот на 2010-тите години воспоставил контакт со извршниот директор на „Енвидија“.
Канг подоцна го запознал Хуанг со својата сопруга, Алис Хуанг (чието кинеско име е Хуанг Ле). Таа моментално е под истрага од страна на американските власти поради сомневања дека соработувала со кинеските разузнавачки служби.
Ја нарекувал сопругата „личен асистент“ на Хуанг
Според извори на „Волстрит џурнал“, Канг бил свесен за романтичната врска на неговата сопруга со извршниот директор на „Енвидија“ и не се обидел да ја прекине. Наводно, тој отворено зборувал за нивната врска пред познаници, шегувајќи се дека неговата сопруга е „личен асистент“ на Хуанг. Сепак, зад оваа врска наводно стоеле и деловни интереси.
Лица запознаени со деловните активности на двојката тврдат дека Канг и Алис Хуанг ги искористиле личните врски – вклучително и нејзиниот пристап до првиот човек на „Енвидија“ – за собирање капитал и склучување договори во Кина, Сингапур, Тајван и на други пазари.
Во раните 2020-ти години, двојката сè повеќе ги насочувала своите деловни активности кон секторот за компјутерство во облак (cloud computing).
Компанија поврзана со Алис Хуанг е под истрага
Во 2023 година, Алис Хуанг презеде висока функција во компанијата „Мегаспид интернешнал“ (Megaspeed International) со седиште во Сингапур. Оваа компанија управува со податочни центри и стана значаен купувач на чипови од „Енвидија“, кои се наменети за развој на вештачка интелигенција.
Работењето на компанијата го привлече вниманието на американските истражни органи. Претставници на Министерството за трговија на САД, а подоцна и на Министерството за правда, испитуваа дали „Мегаспид“ била вклучена во пренасочување на напредни чипови од „Нвидиа“ кон Кина, со што би се прекршиле американските ограничувања за извоз.
Сингапурските власти ја испрашаа Алис Хуанг во 2025 година и потврдија дека истрагата за работењето на „Мегаспид“ сè уште трае.
Сепак, сингапурските претставници нагласија дека нивната истрага не ги опфаќа наводните врски на Алис Хуанг со кинеските разузнавачки структури. Обвинувањата за нејзината улога во разузнавачки активности, како и тврдењата дека таа искористила личен однос со извршниот директор на „Нвидиа“ за деловни цели, засега остануваат предмет на медиумски извештаи и истраги, а не правно утврдени факти.
