Лора Бренд се огласи за првпат откако нејзиниот сопруг, Расел Бренд, беше прогласен за виновен за силување и сексуален напад, најавувајќи дека ќе продолжи со емисијата што ја водеа заедно.
Лора (39) се појави сама во епизода од нивната неделна програма на „Јутуб“, „Неделна служба со семејството Бренд“ („Sunday Service with the Brands“), емитувана на 15 ноември. Таа изјави дека има намера да продолжи да ја чита Библијата за нивните следбеници, и покрај тоа што нејзиниот сопруг е во затвор.
„Емисијата можеби ќе изгледа поинаку, но амбициите остануваат сосема исти“, рече Лора, признавајќи дека целата ситуација е „болна“ и дека „очигледно ќе биде потребно време за прилагодување“.
„Веруваме во Бог, веруваме во Неговиот план и веруваме дека Тој прави сè онака како што треба да биде“, додаде таа.
Лора исто така откри дека разговарала со својот сопруг, наведувајќи дека тој „е добро“ и „се моли“.
Претходно овој месец, Расел Бренд беше осуден на 10 години и шест месеци затвор за силување и сексуален напад, по судењето што траеше речиси четири недели.
Пресудата се однесува на настани од 2000-тите години; во текот на правната постапка, Бренд категорично негираше какво било прекршување на законот.
По изрекувањето на пресудата, уште шест жени излегоа со обвинувања за сексуално недолично однесување, при што наводните инциденти се случиле во истиот период како и оние за кои Бренд беше осуден. Миа Летер, една од жените што претходно го обвинија, за првпат јавно го откри својот идентитет и сподели детали за наводното злоставување, кое се случило кога таа имала само 16 години.
Претставникот на Бренд сè уште нема дадено коментар за новите обвинувања.
Бренд (51) е префрлен во затвор со низок степен на безбедност, каде што има сопствена ќелија и пристап до активности како јога и куглање. На Лора ѝ е дозволено да го посетува еднаш неделно, но интимни посети не се дозволени. Двојката има три деца. Во петокот, актерот беше преместен во затворот „Литлхеј“ (HMP Littlehey) во Кембриџшир, Англија – установа во која се сместени околу 1.200 мажи осудени за сексуални престапи.
„Се слушнало како првата ноќ бара ќебиња, а од неговото пристигнување е одреден дополнителен персонал да го надгледува“, изјави извор за „Сан“ (The Sun), додавајќи дека Бренд сè уште немал никаков контакт со другите затвореници.












