Светското првенство повторно покажа дека најубавите приказни не се секогаш поврзани со головите и трофеите. По спектакуларното реми од 2:2 против Уругвај, Капе Верде доби херој кој го освои светот и надвор од теренот – искусниот голман Возиња.

Четириесетгодишниот чувар на мрежата веќе стана сензација на турнирот по фантастичниот настап против Шпанија, кога со низа неверојатни одбрани му донесе историски бод на својот тим. Но, зад неговата спортска приказна се криеше и една многу емотивна животна приказна.

По првиот натпревар, Возиња откри дека неговата најголема желба не се однесува на фудбалот. Неговата мајка Ана Кандида Евора не можела да отпатува во САД поради проблеми со визата и високите трошоци, па најважните моменти од кариерата на својот син ги следела од далечина.

Неговата исповед брзо се прошири низ светот и предизвика огромни симпатии. Набргу потоа пристигнаа и прекрасни вести – Ана успеа да отпатува во САД и да биде на трибините за натпреварот против Уругвај.

Камерите неколкупати ја покажаа за време на мечот, а нејзините емоции беа невозможно да се сокријат. Таа со солзи во очите го бодреше својот син и репрезентацијата на Капе Верде.

По последниот свиреж следуваше момент кој го обиколи светот. Возиња веднаш истрча кон трибините, каде што го чекаше неговата мајка, а нивната прегратка стана една од најтрогателните сцени на Светското првенство.

Фотографиите и снимките за неколку часа ги преплавија социјалните мрежи, а навивачите ширум светот порачаа дека токму ваквите моменти го прават фудбалот посебен.

За Возиња, оваа прегратка веројатно значеше повеќе од сите негови спектакуларни одбрани. Додека Капе Верде продолжува да сонува за нокаут-фазата, голманот веќе го освои срцето на светот со приказна која долго ќе се памети.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ