Собранието со 82 гласа „за“ го донесе Законот за пријавување и проверка на странски директни инвестиции. Пратениците ги изгласаа и одлуките за распишување јавен оглас за избор на членови на Советот за граѓански надзор и за именување член на Регулаторната комисија за енергетика, водни услуги и услуги за управување со комуналниот отпад. Беа прифатени и четири амандмани на дополнетиот предлог-закон за државна ревизија, по што текстот ќе биде доуреден и за него во целост ќе се гласа на друга седница.
Пратениците ги изгласаа и измените и дополнувањата на Законот за јавни набавки во прво читање, со кои се предвидува поедноставување на постапките, поголема дигитализација, зајакнување на транспарентноста и на контролата, како и професионализација на службениците.
Заменик-министерот за финансии, Николче Јанкуловски, посочи дека една од клучните измени е зголемувањето на вредносните прагови за примена на Законот. Кај класичниот јавен сектор, прагот за стоки и на услуги се зголемува од 1.000 на 2.000 евра, а за работи – од 5.000 на 10.000 евра. Кај секторските дејности, праговите се зголемуваат на 4.000, односно 20.000 евра.
Се зголемува и прагот за набавки преку електронскиот пазар за набавки од мала вредност, до 20.000 евра, со цел поедноставно набавување стандардизирани стоки и услуги.
Со измените се зајакнуваат и надлежностите на Бирото за јавни набавки, кое ќе може да развива дигитални алатки и решенија засновани на вештачката интелигенција, за следење ризици и за откривање неправилности.
Предвидена е и професионализација на службениците преку континуирано професионално усовршување наместо досегашното повторно полагање испит при ресертификација. Од 2027 година се планира и поширока примена на критериумот „најдобар однос меѓу цената и квалитетот“ кај набавките над 130.000 евра.
На седницата се разгледуваат и измени на законите за надворешни работи, данокот на личен доход, заштитата на децата, минималната плата, работните односи, како и законите поврзани со критичната инфраструктура, високото образование и со научноистражувачката дејност.
Пратениците претходно на натамошно читање ги дадоа и измените на законите за високи раководители, административни службеници, вработени во јавниот сектор, плати и други надоместоци на избрани и именувани лица, како и Законот за шуми.
