Силен топлотен бран се заканува на поголемиот дел од САД – високите температури ќе се задржат повеќе од една недела

Голем и опасен топлотен бран се формира денес низ САД, со температури над 37 степени Целзиусови што се очекуваат на југозапад овој викенд, пред да се прошират кон исток под купола од висок притисок за кој синоптичарите велат дека ќе ги одржи температурите високи една недела или подолго.

Синоптичарите ги советуваат луѓето да останат хидрирани и да најдат места за разладување, предупредувајќи дека температурите ќе бидат од осум до 14 степени Целзиусови над нормалата во многу области, дури и ноќе, што е особено лошо за здравјето на луѓето бидејќи нивните тела нема да имаат шанса да се опорават.

Се очекува топлотниот бран да влијае на дури две третини од континенталниот дел на САД.

„Жештината нема да престане по стемнување“, рече Џош Адам, метеоролог за Националната метеоролошка служба во Бизмарк, Северна Дакота, каде што се очекува температурите да достигнат 100 степени во вторник, драматичен скок за држава каде што летните максимални температури обично се околу 78 степени.

Метеоролошката служба предвидува дека до следната среда ќе бидат соборени повеќе од 90 локални рекорди за температура во САД, а две третини од нив ќе бидат рекорди за топлина во текот на ноќта. Не се очекува температурите да паднат под 80 степени Фаренхајт (27 степени Целзиусови) преку ноќ во Форт Лодердејл, Мајами, Тампа, Флорида, Галвестон, Тексас и Чарлстон, Јужна Каролина.

Куполата на топол воздух, која се формира кога висок притисок го заробува топол воздух додека ги блокира ладните ветрови и дождот, е една од најсилните што ја погодиле Северна и Јужна Дакота во последните 25 години, рече Чед Мерил, метеоролог од „Акуведер“ (AccuWeather).

Рекордни температури над 100 степени Фаренхајт (37 степени Целзиусови) се очекуваат во текот на викендот за Невада, Јута, Колорадо, Вајоминг, Ајдахо, Монтана и Северна и Јужна Дакота.

Невада, држава навикната на топлина, е уште потопла од нормалното, рече Ендру Горлоу, метеоролог за Националната метеоролошка служба во Лас Вегас. Се очекува температурите таму денес да достигнат 120 степени Фаренхајт (48 степени Целзиусови), рече тој.

Се очекува топлината да создаде и ризик од пожар во веќе сувите подрачја.

Климатските промени, предизвикани од согорувањето на јаглен, нафта и природен гас, предизвикуваат поинтензивни и подолги топлотни бранови кои опфаќаат сè повеќе области, велат научниците.

Овогодишните температури ќе бидат под влијание и на Ел Нињо, природно затоплување на екваторијалниот Пацифик што влијае на временските обрасци и ги зголемува температурите низ целиот свет.

Се очекува сегашниот Ел Нињо, кој се формираше минатиот месец и е премногу слаб за да има значително влијание врз овој топлотен бран, да биде меѓу најинтензивните откако метеоролошката служба започна да го следи феноменот во 1950 година, велат експертите, пренесува „Бета“.