Сијарто ја обвини ЕУ за мешање во изборите во Унгарија

„Оската Брисел-Берлин-Киев сериозно се меша во изборната кампања во Унгарија со цел да ја ослабне позицијата на сегашната влада, а смртните закани кон премиерот Виктор Орбан и прислушувањето на унгарските функционери претставуваат голем скандал и сериозен напад врз суверенитетот на земјата“, рече унгарскиот министер за надворешни работи Петер Сијарто.

„Оваа оска одлучи опозициската партија Тиса да формира нова унгарска влада, бидејќи сите разбираат дека ако останеме на власт, Унгарија нема да биде вовлечена во војна, унгарските пари нема да одат во Украина, а Украинците нема да влезат во ЕУ“, рече Сијарто на предизборен митинг.

Сијарто го обвини Киев за прекин на испораките на руска нафта преку гасоводот Дружба, за напад на инфраструктурата на гасоводот Турски тек, за заканување дека ќе го убие унгарскиот премиер Виктор Орбан и неговото семејство, а сега е ангажирана и во „прислушување на телефоните на унгарските функционери“. „Ова е голем скандал и сериозен напад врз суверенитетот на земјата. Сепак, фактот е дека без разлика што прават тајните служби, без разлика колку прислушуваат, без разлика кого се обидуваат да заплашат, без разлика колку се обидуваат да го нарушат снабдувањето со енергија, ние нема да попуштиме и ќе ги браниме националните интереси и суверенитетот на Унгарија“, рече Сијарто.

Тој го подвлече ставот дека, доколку владејачката партија Фидес победи на парламентарните избори на 12 април, Унгарија ќе се држи до својот став за Украина, нема да ѝ дава воена или финансиска помош на земјата и ќе стори сè за да го спречи нејзиното пристапување кон ЕУ.