Шпионска афера во Загреб: Уапсен хакер од Србија, влегол во компијутерските системи и податоците на неколку јавни институции

Државното обвинителство во Загреб на 30 јули соопшти дека сослушало српски државјанин, роден во 1993 година, под сомнение за повеќе кривични дела против компјутерски системи, програми и податоци, како и за неовластено користење лични податоци.

По сослушувањето, обвинителството побара од судија на Жупанискиот суд во Загреб да одреди истражен затвор поради опасност од бегство, попречување на постапката и опасност од повторување на делото; судот го прифати барањето.

Според обвинителството, постои основано сомнение дека осомничениот – криејќи го својот идентитет и локација и користејќи методи што овозможуваат анонимен пристап до компјутерски системи – во текот на 2026 година неовластено пристапил до компјутерските системи и податоците на неколку јавни институции и правни лица основани од Република Хрватска.

Претходно, хрватската полиција соопшти дека е завршена кривичната истрага против полнолетниот српски државјанин во врска со сомнение за тешки кривични дела против компјутерски системи, програми и податоци, како и за неовластено користење лични податоци.

Од полицијата наведоа дека, во текот на истрагата и постапувајќи по судски налози, извршиле претреси на простории, возила и електронски уреди, како и дека одзеле предмети и дигитални податоци поврзани со кривичните дела.

Осомничениот бил предаден на надлежниот службеник за притвор на 29 јули, а до обвинителството во Загреб била поднесена кривична пријава.

Овој случај следи по низата сајбер-напади пријавени од хрватските институции во последните месеци. Хрватските власти не соопштија дали постои поврзаност меѓу тие настани и истрагата против српскиот државјанин, а РСЕ (RFE) не можеше независно да го потврди тоа.