Шпанија бара меѓународно ембарго за оружје против израелската влада за да се стави крај на војната и хуманитарната катастрофа во Појасот Газа.
„Сите мораме да се согласиме за заедничко ембарго за оружје“, изјави во неделата министерот за надворешни работи Хозе Мануел Албарес за новинарите на почетокот на состаноците на министрите на таканаречената Мадридска група во шпанската престолнина.
„Последното нешто што му треба на Блискиот Исток во моментов е оружјето.
Албарес повика на „итно суспендирање“ на договорот за партнерство на Европската унија со Израел, мерка која моментално ја разгледува Брисел и наметнување насочени санкции против поединци „кои го попречуваат решението за две држави“.
Доколку е потребно, треба да се воведат санкции и против израелскиот премиер Бенјамин Нетанјаху, рече Албарес.
„Ништо што овде се дискутира не е насочено против државата Израел“, нагласи водечкиот шпански дипломат. Но, тој исто така рече дека „Палестинците ги имаат истите права на мир и безбедност како и Израелците“.
Нема алтернатива за решението со две држави за да се постигне траен и праведен мир, рече Албарес.
Во интервју за France Info, министерот рече: „Која е алтернативата? Да ги убиете сите Палестинци? Да ги тргнете, не знам каде, на Месечината? Или да им дадете израелско државјанство?“
Шпанската влада е една од најкритичните влади во Европа за израелската војна во Газа. Во септември минатата година го организираше првиот состанок на Мадридската група.
Учесниците се високи претставници од околу 20 земји од Европа и арапскиот свет, како и од Бразил и се состануваат по втор пат.
Од почетокот на војната, израелската армија убила повеќе од 53.900 Палестинци, а ранила повеќе од 122.700.
