Се заканува голема суспензија по хаосот во финалето на СП

ФИФА отвори дисциплинска истрага против Аргентина, по масовната тепачка што изби веднаш по финалето на Светското првенство во кое Шпанија ги совлада „гаучосите“ со 1:0 и ја освои светската титула.

Дисциплинската комисија назначи дисциплински и етички обвинител што ќе ги испита сите околности околу инцидентот на стадионот „Мет лајф“, а можно е да следуваат суспензии за играчи и за членови на стручниот штаб, како и парична казна за Аргентинската фудбалска асоцијација.

Во центарот на инцидентите беа Науел Молина, Леандро Паредес, Тијаго Алмада и помошникот тренер Роберто Ајала. Според извештаите, Паредес го фатил Ерик Гарсија за вратот, Алмада го оттурнал Гави, а Ајала, исто така, бил вмешан во физичката пресметка.

Иако првично беше објавено дека Паредес доби црвен картон, ФИФА подоцна потврди дека исклучувањето било избришано од официјалниот извештај, но тоа не значи дека ќе избегне дисциплинска постапка.

Аргентина веќе е предмет на уште една истрага на ФИФА поради политичкиот транспарент „Las Malvinas son Argentinas“, кој го истакнаа играчите по полуфиналната победа над Англија.

Селекторот Лионел Скалони се обиде да ја смири ситуацијата, порачувајќи дека неговата репрезентација мора достоинствено да го прифати поразот, но пристигнаа остри критики од англиските легенди Алан Ширер и Џо Харт, кои го оценија однесувањето на аргентинските фудбалери како „ужасно“ и „одвратно“.

ФИФА има широки овластувања во вакви случаи. Според дисциплинскиот кодекс, можна е долга суспензија доколку се утврди дека играчите го нарушиле угледот на фудбалот или ги прекршиле принципите на ферплеј. Претходно, Луис Суарес доби четиримесечна суспензија по каснувањето на Џорџо Кјелини, а Луис Рубијалес беше исфрлен од фудбалот на три години.

Аргентина и претходно беше санкционирана поради однесувањето на своите репрезентативци. По титулата на СП 2022, беше казнета со повеќе од 20.000 евра, а голманот Емилијано Мартинес во 2024 година заработи суспензија поради навредливо однесување.

Засега нема рок до кога треба обвинителот на ФИФА да ја заврши истрагата, но доколку биде утврдено прекршување, неколкумина аргентински репрезентативци би можеле да се соочат со сериозни санкции и со забрана за настап на меѓународната сцена.