Министерството за внатрешни работи на Црна Гора понуди награда до 500.000 евра за информации што би можеле директно да помогнат во лоцирањето, пронаоѓањето и апсењето на Радоје Звицер (42), црногорски државјанин за кого Интерпол издаде меѓународна црвена потерница.
Звицер се бара под сомнение за поврзаност со низа тешки кривични дела. Тие вклучуваат организиран криминал, тешко убиство, убиство, поттикнување на тешко убиство, како и обид за убиство со поттикнување. Потерницата, исто така, вклучува и сомневања за неовластено производство и трговија со наркотици, нелегално поседување оружје и експлозиви и перење пари.
Министерството за внатрешни работи на Црна Гора нагласува дека наградата ќе се разгледува само за информации што се точни, проверливи и од директно значење за пронаоѓање и апсење на бараното лице.
За информациите да бидат прифатени како веродостојни, тие мора да овозможат специфично полициско дејствување, директно да придонесат за оперативни активности и да играат одлучувачка улога во успешното апсење на Звицер.
Поради чувствителноста на постапката, информациите се доставуваат лично и доверливо до директорот на Полициската управа, помошникот директор задолжен за борба против криминалот или началникот на Специјалниот полициски оддел.
Одлуката за тоа дали наградата ќе се исплати ја донесува Владата на Црна Гора, на предлог на Министерството за внатрешни работи, откако ќе се потврдат доставените информации и нивната вистинска вредност за полициската акција.
Министерството за внатрешни работи посебно нагласи дека идентитетот на лицето кое ги дава информациите ќе биде целосно заштитен.
Сепак, правото на награда нема да им се додели на лица кои веќе имале информации во посед на полицијата, полицајци и членови на нивните потесни семејства, како и на лица кои на кој било начин учествувале во кривичните дела за кои се бара Звицер.
Радоје Звицер, кого црногорските власти го поврзуваат со кавачкиот клан, веќе е осуден на 16 години затвор во една кривична постапка во Црна Гора.
Во друга постапка, тој е осуден во прв степен на 40 години долгогодишна затворска казна.
Со понуда од половина милион евра, црногорските власти сега се обидуваат да добијат конкретни информации што би можеле да овозможат негово лоцирање и апсење.
