СЕ ПОДГОТВУВА ГОЛЕМА ЗАБРАНА НА СОЦИЈАЛНИТЕ МРЕЖИ!

Европската унија подготвува предлог за ограничување на пристапот до социјалните мрежи, платформите за споделување видеа, чет-ботовите со вештачка интелигенција и онлајн игрите за деца под 15-годишна возраст. Ова е дел од најсеопфатниот европски план досега за заштита на малолетниците од опасностите во дигиталната средина.

Планот е дел од претстојниот „Закон на ЕУ за децата“ (EU Kids Act), кој претседателката на Европската комисија, Урсула фон дер Лајен, и извршната потпретседателка за технолошки суверенитет, безбедност и демократија, Хена Виркунен, се очекува да го претстават во четврток, иако некои детали би можеле да бидат откриени уште за време на говорот за состојбата на Унијата.

Од социјални мрежи до чет-ботови со вештачка интелигенција

Предлогот би опфатил не само платформи за социјални медиуми како Facebook, Instagram и TikTok, туку и платформи за споделување видеа како YouTube, чет-ботови со вештачка интелигенција како ChatGPT и платформи за онлајн игри.

Европските претставници се сè позагрижени за потенцијалното влијание на дигиталните платформи врз здравјето и безбедноста на децата, вклучително и изложеноста на штетни содржини, сајбер-малтретирањето, експлоатацијата и механизмите што поттикнуваат прекумерна употреба на овие услуги.

„Пристапот на Унијата треба да им овозможи на малолетниците да го искористат огромниот потенцијал на дигиталните услуги, истовремено штитејќи ги од злоупотреба и експлоатација. Треба да го ограничиме пристапот на технолошките компании до нашите деца, а не обратно“, се наведува во документ на Европската комисија во кој увид имала агенцијата Ројтерс.

Според планот, пристапот до различни видови дигитални услуги би се воведувал постепено, врз основа на возраста на детето, додека обврските на технолошките компании би варирале во зависност од видот на платформата и возраста на корисникот.

Децата на возраст од 13 до 14 години би можеле да имаат основна сметка под родителски надзор, додека сметките за помладите деца би требало целосно да бидат контролирани од родителите.

Од компаниите што ги обезбедуваат дигиталните услуги опфатени со предлогот, исто така, ќе се бара да плаќаат надоместок за надзор.

Европската комисија сè уште официјално не ги коментирала деталите од протечениот документ.

Сè почести повици за ограничувања низ Европа

Предлогот доаѓа во време кога сè поголем број земји-членки на ЕУ размислуваат за воведување или веќе спроведуваат сопствени ограничувања за користењето социјални мрежи од страна на децата, што создава потреба од унифицирани европски правила наместо расцепкан систем од различни национални регулативи.

Холандија и Шпанија веќе повикаа на воведување минимална старосна граница на ниво на целата ЕУ, предлагајќи правилата да се прошират и на видеоигрите, чет-ботовите со вештачка интелигенција и други дигитални услуги што можат да претставуваат ризик. Францускиот претседател Емануел Макрон е исто така силен застапник за забрана на користењето на социјалните мрежи за лица помлади од 15 години и ја повика Европската Унија што поскоро да ги усогласи правилата во сите земји-членки.

Предизвикот за верификација на возраста на корисниците

Еден од клучните предизвици за идниот систем ќе биде сигурната верификација на возраста на корисниците, бидејќи постоечките механизми често им овозможуваат на децата едноставно да внесат лажен датум на раѓање при креирањето на сметка.

Европската комисија претходно дојде до прелиминарен заклучок дека „Мета“ (Meta) не направила доволно за да спречи деца помлади од 13 години да ги користат „Фејсбук“ и „Инстаграм“, наведувајќи ја можноста за внесување погрешен датум на раѓање без ефективна верификација како еден од проблемите.

Како резултат на тоа, Брисел работи на решенија за верификација на возраста на ниво на цела Европа, кои треба истовремено да обезбедат поефективна заштита на децата и да ја зачуваат приватноста на корисниците, додека пак унифицираниот пристап има за цел да спречи расцепканост на правилата меѓу земјите-членки на ЕУ.