Руски напад врз мост во Киев – возачот дал гас и избегнал трагедија со голем број жртви/ВИДЕО

Руските сили денес го нападнаа Јужниот мост (Пивдениј мост) во Киев – една од клучните сообраќајни артерии на украинскиот главен град – потврди градоначалникот на Киев, Виталиј Кличко.

Според првичните информации, мостот бил погоден од две беспилотни летала, а нападот се случил додека преполн воз на метрото минувал преку мостот, заедно со десетици цивилни возила на коловозот.

Кличко го потврди нападот, наведувајќи дека две руски беспилотни летала го таргетирале стратешки важниот мост што ги поврзува источниот и западниот дел на Киев.

Украинските медиуми и очевидци известуваат дека во нападот било употребено беспилотно летало со млазен погон – веројатно варијанта на борбеното беспилотно летало „Шахед“ – кое удрило во непосредна близина на мостот и конструкциите на надземните далноводи.

На социјалните мрежи набрзо се појавија снимки од драматичниот момент на ударот. Според украинските канали, машиновозачот на метрото ја забележал опасноста, нагло го забрзал возот и успеал да ја напушти зоната на ударот со целиот воз, со што за влакно избегнал потенцијална трагедија со голем број жртви.

A Russian jet drone just tried to target a train full of commuters as it crossed one of Kyiv's main bridges, barely missing amid bridge wires.

It's all just genocide now. pic.twitter.com/6yHrOHSS1v

— Jay in Kyiv (@JayinKyiv) October 1, 2026

Засега нема официјална потврда за степенот на структурните оштетувања на мостот или за точниот број на евентуални повредени лица.

Јужниот мост, завршен кон крајот на 1990 година, е највисокиот и еден од најважните мостови преку реката Днепар во Киев. Станува збор за комбиниран мост со коси затеги, кој овозможува сообраќај на две нивоа – вклучувајќи дел од автопатот кон Меѓународниот аеродром „Бориспил“, како и Зелената линија на киевското метро (линијата Сирецко-Печерска). Стотици илјади жители го користат секојдневно за патување меѓу станбените населби на Левиот брег и центарот на градот на Десниот брег.

Покрај неговото значење за сообраќајот, Јужниот мост носи и клучни инфраструктурни водови, вклучувајќи гасовод под висок притисок и електрични кабли што снабдуваат делови од градот.

Поради неговата стратешка важност, сообраќајот преку мостот е строго ограничен и подложен на посебни безбедносни мерки уште од почетокот на руската инвазија во февруари 2022 година.

Украинските власти и други извори го опишуваат директното таргетирање на оваа локација како нов руски воен злостор.