Руски мотоциклист осомничен за саботажа на аеродромот во Лајпциг: Со години бил во контакт со полковник од ГРУ/ФОТО

Рускиот државјанин Олег Левушкин е во фокусот на истрагата за неуспешен обид за саботажа на аеродромот Лајпциг/Хале во Германија. Заедничката истрага на германскиот медиум „Велт“ (WELT) и британскиот „Телеграф“ (Telegraph) укажува дека германските истражители се сомневаат оти Левушкин организирал операција во која дрон со експлозив требало да нападне украински товарен авион, пренесува „Еуроњуз“.

Според извештаите на германските медиуми, Левушкин со години одржувал контакт со Денис Смољанинов, полковник во руската воена разузнавачка служба, ГРУ. Европските безбедносни служби го поврзуваат со руски разузнавачки мрежи и се сомневаат дека тој дејствувал како логистичар и инструктор во случајот во Лајпциг.

Истражителите утврдиле дека Левушкин патувал во Германија преку Турција, а потоа изнајмил автомобил на аеродром во Берлин. Податоците за движењето на возилото покажуваат дека тој посетил повеќе локации; особено значајно е тоа што на 31 јули – неколку дена пред инцидентот – наводно извршил извидување на аеродромот Лајпциг/Хале.

Во текот на ноќта меѓу 4 и 5 август, на аеродромот, во близина на украински товарен авион „Антонов Ан-124“, била пронајдена експлозивна направа доставена со дрон. Направата не експлодирала, а германските власти подоцна соопштиле дека наодите од истрагата укажуваат на вмешаност на руски државни актери. Москва ја негирала одговорноста за инцидентот, пренесува „Тагесшау“ (Tagesschau).

Истражителите се сомневаат дека Левушкин немал намера лично да го изврши нападот; наместо тоа, за негово извршување наводно бил ангажиран белорускиот државјанин Андреј Каршаков. Во случајот има и други осомничени, а германските власти продолжуваат да ги утврдуваат улогите на сите поединци кои можеби биле вклучени во планирањето на нападот.

По престојот во Германија, Левушкин отпатувал од аеродромот Берлин-Бранденбург во Србија; според претходните истражни наоди, тој моментално се наоѓа во Русија. Германските власти го сметаат за клучен осомничен во случајот, иако сè уште нема конечна судска пресуда со која би се утврдила неговата одговорност.

🇩🇪🇷🇺 A Russian biker linked to the GRU organized a sabotage attempt at Leipzig airport

Oleg Levushkin may have planned the attack at Leipzig-Halle. Belarusian Andrei Karshakov allegedly carried it out.

German journalists said Levushkin entered via Turkey, rented a car in Berlin, scouted the airport, then tasked Karshakov with the job.

The device matched others from suspected sabotage cases in Europe. Investigators believe the explosives were brought in via Bulgaria and Serbia, hidden in trucks.

Levushkin had long been in contact with GRU officer Denis Smolyaninov, described as the main organizer of Russian attacks across Europe. Lithuanian intelligence says he heads the GRU’s Ukraine department.

— Visegrád 24 (@visegrad24) October 2, 2026

На фотографиите објавени во медиумите, Левушкин е прикажан како мотоциклист – слика што е дел од неговиот јавен имиџ. Неговите врски со Смољанинов, патувањата низ Европа и движењата непосредно пред инцидентот сега се дел од истрагата што има за цел да утврди кој го организирал обидот за напад на аеродромот во Лајпциг.