Руските власти ги отфрлија тврдењата дека 28-годишната лабораториска техничарка Дарија Шипилова, вработена во институтот за контрола на чума во сибирскиот регион Иркутск, починала од оваа болест. Руските официјални лица наведуваат дека по нејзината смрт, со анализите на биолошките примероци не се пронајдени траги од инфекција со чума, додека епидемиолошката состојба во регионот е оценета како стабилна.
Информациите за смртта на младата техничарка се појавија во петокот и предизвикаа загриженост поради можноста нејзината смрт да е поврзана со нејзината работа во лабораторијата.
Некои извештаи, повикувајќи се на неименувани извори блиски до регионалните безбедносни служби, укажуваа на можноста Шипилова да се заразила со белодробна чума откако во лабораторијата се скршила епрувета. Се споменуваше и можноста за лабораториска несреќа.
Властите: Причина за смртта е воспаление на белите дробови со непозната етиологија
Гувернерот на Иркутската област, Игор Кобзев, во понеделникот изјави дека посебна стручна комисија утврдила оти причина за смртта било „воспаление на белите дробови со непозната етиологија“.
Кобзев на „Телеграм“ истакна дека руската служба за заштита на потрошувачите и здравствен надзор, „Роспотребнадзор“, ги анализирала биолошките примероци од починатата техничарка.
Според неговите зборови, во примероците „не се пронајдени микроорганизми поврзани со нејзината професионална работа“.
Гувернерот додаде дека по смртта на техничарката не е забележан нов случај во кој некој од вработените во институтот за контрола на чума побарал медицинска помош.
Поради тоа, тој ја оцени санитарно-епидемиолошката состојба во регионот како „стабилна“.
„Ситуацијата останува под наша контрола и под надзор на експерти“, порача Кобзев.
Кремљ: Потпирајте се на официјалните информации
За случајот се огласи и портпаролот на Кремљ, Дмитриј Песков, кој им порача на новинарите да се потпираат на официјалните информации од здравствените и санитарните служби.
Песков ја повика јавноста „да се потпре на официјалните изјави на ’Роспотребнадзор‘, а не на гласини и шпекулации“.
Руските власти со тоа ги отфрлаат извештаите според кои смртта на лабораториската техничарка е поврзана со чума или можен инцидент во лабораторијата.
Според официјалниот наод што го објави гувернерот на Иркутската област, Дарија Шипилова починала од воспаление на белите дробови чија етиологија не е утврдена, додека во нејзините биолошки примероци не се пронајдени микроорганизми поврзани со нејзината работа.
