Резервациите далеку под очекувањата: Американските хотелиери разочарани, нема печалба од Мундијалот

ФИФА најави спектакл, но малку повеќе од еден месец пред почетокот на Мундијалот американските хотелиери се разочарани. Изостана очекуваното зголемување на резервациите.

Според магазинот „Форбс“, речиси 80 проценти од хотелиерите од 11. градови домаќини наведуваат дека заостануваат резервациите зад прогнозите. Покрај тоа, некои од нив тврдат дека Светското првенство во фудбал речиси и да нема никакво влијание врз туризмот и економијата, објави американската Асоцијација за хотели и сместување (АХЛА). Анкетата покажува дека само една четвртина од испитаниците забележале значително зголемување на резервациите, главно на пазарите што веќе имаат силна туристичка побарувачка или во градовите каде што се камповите на националните тимови. ФИФА претходно процени дека Светското првенство ќе генерира дури 30,5 милијарди долари економска активност, очекувајќи милиони навивачи. Но, се чини дека меѓународната побарувачка би можела да биде значително послаба. Постојат неколку причини за тоа: од компликуваните процедури за виза и поширокиот геополитички контекст до фактот дека турнирот е распослан на голем број локации, што ги зголемува трошоците и логистичките предизвици за навивачите.

Во Канзас Сити, дури 85-90 проценти од хотелиерите истакнуваат дека се послаби резервациите отколку во вообичаените летни месеци, кога нема големи настани. Слична е ситуацијата и во Бостон, Филаделфија, Сан Франциско и во Сиетл, каде што речиси 80 проценти од испитаниците тврдат дека Светското првенство е „практично незабележливо“. Ниту во Лос Анџелес  ниту во Њујорк е подобро, околу две третини од хотелите забележаа послаби резултати од очекуваните. Во Тексас, вклучувајќи ги Далас и Хјустон, околу 70 проценти од хотелиерите, исто така, пријавуваат недоволно резервации. Сепак, не е така насекаде. Мајами се издвојува како позитивен пример. Таму околу 55 проценти од хотелиерите бележат резервации над очекувањата, додека околу половина од хотелите во Атланта следат сличен тренд.

Американските хотелиери го обвинуваат претседателот на ФИФА, Џани Инфантино, дека претставил нереална слика за економскиот ефект од Светското првенство во јавноста. Исто така, градоначалничката на Њу Џерси, Мики Шерил, отворено ја обвини ФИФА дека не издвоила средства за организација на превозот на десетици илјади навивачи до стадионот и назад, додека во исто време цените на превозот во одредени градови домаќини енормно се зголемија.