Десетици илјади луѓе денеска се собраа во Амстердам на протест, барајќи холандската влада да заземе поцврст став кон Израел во врска со војната во Појасот Газа.
Организаторите на демонстрациите, група во Холандија наречена „Црвена линија“ (Red Line), побараа построги трговски санкции против Израел, признавање на геноцид во Газа и прекин на продажбата на оружје за Израел.
Демонстрантите, од кои многумина беа облечени во црвено, извикуваа про-палестински пароли.
Холандскиот огранок на „Амнести интернешенел“, една од групите организатори, на интернет објави дека на маршот се приклучиле повеќе од 200.000 луѓе.
Роб Јетен, претставник на владата кој минатата година учествуваше на маршот, но денеска не беше присутен, во петокот за време на редовна прес-конференција ги бранеше постапките на владата.
„Секој ден и секоја недела правиме сè што е во наша моќ за да ја ублажиме ужасната ситуација таму“, рече тој.
Тој додаде дека неговата администрација врши „посилен политички и дипломатски притисок“ врз Израел за да ги почитува договорите што се однесуваат на Газа.
Истовремено, како што истакна Јетен, владата врши притисок и врз палестинската милитантна група Хамас, како и врз други организации кои, според него, продолжуваат да спроведуваат „различни операции што ја загрозуваат безбедноста на обичните Израелци“.
