Радишани ќе добие нов затворен базен

Во основното училиште „Ацо Шопов“ во Радишани почната изградбата на затворен базен. На поставувањето на камен-темелникот присуствуваа премиерот Христијан Мицкоски, министерката за образование и наука, Весна Јаневска, и градоначалникот на Општина Бутел, Дарко Костовски.

Градоначалникот Костовски истакна дека овој базен, чија изградба ќе биде завршена за 18 месеци, ќе биде модерен објект, изграден по сите стандарди и ќе им служи, пред сѐ, на учениците, спортистите, но и на сите граѓани.

– Објектот ќе се простира на површина од 621 квадратни метри, со четири летни за пливање и ќе има посебни простории за соблекувални и тушеви. Базенското корито ќе биде со правоаголна форма. Базенот ќе ги задоволува сите потреби за тренинг и за натпревари според прописите на светската пливачка федерација, ФИНА – нагласи Костовски.

Тој наведе дека пливањето, како спорт, има огромно значење за здравјето и за развојот на младите генерации.

– Со оваа инвестиција, која е во вредност од 77.000.000 денари, овозможуваме не само услови за развој на спортските таленти туку и простор за рекреација и здрав живот за сите жители на Општината – изјави Костовски.

Премиерот Мицкоски додаде дека со доградбата на училиштето „Ацо Шопов“ ќе се подобрат условите за учениците и ќе се зголеми квалитетот на живот на жителите од овој дел на Радишани.

– Со овие проекти, полека, но сигурно обезбедуваме подобри услови за живот на граѓаните во сите општини низ државата. Тоа значи дека проектот ја постигнал својата цел – оцени Мицкоски.

Тој потенцираше дека Владата продолжува со реализацијата на започнатите проекти, додека за оние што досега не биле започнати, се поставува камен-темелник и се воведуваат во работа.

Мицкоски најави дека веќе се размислува за продолжување на оваа иницијатива и во 2027 година, оценувајќи дека досегашниот модел се покажал како успешен.

(А. П.)