Рускиот претседател Владимир Путин во средата ги повика граѓаните да учествуваат на претстојните парламентарни избори, наведувајќи дека нивната одлука ќе ја покаже поддршката за руските војници и единството на земјата пред надворешните притисоци.
Тродневните парламентарни избори започнуваат во петок; гласачите ќе го избираат составот на долниот дом на парламентот, Државната дума, која има 450 пратенички места и чии пратеници доследно ги поддржуваат иницијативите на Кремљ.
Ова се првите парламентарни избори во Русија од почетокот на инвазијата врз Украина во февруари 2022 година. Изборите се одржуваат во услови на економски притисоци и растечка загриженост кај дел од Русите во врска со последиците од војната, додека повеќето антивоени кандидати се исклучени од изборната трка.
Рускиот политички систем е цврсто контролиран, а се очекува владејачката партија „Единствена Русија“, поддржана од Путин, да ја задржи својата доминација во парламентот.
Во телевизиското обраќање до нацијата пред изборите, Путин го поврза гласањето со војната во Украина и руската контрола врз делови од украинската територија.
„Вашиот избор и вашата волја уште еднаш ќе покажат дека милиони луѓе стојат зад нашите војници, дека сме обединет народ поврзан со заеднички вредности, историско сеќавање и љубов кон татковината“, рече Путин.
Тој додаде дека гласањето ќе послужи како колективен одговор на оние што сакаат да ја ослабат Русија, да го попречат нејзиниот развој и да ѝ го одземат суверенитетот, пренесе „Хина“.
