Првата „вакцина со вештачка интелигенција“ успешно тестирана на луѓе

Научниците од Универзитетот во Кембриџ развија „фундаментално нов“ тип на вакцина чија клучна состојка е целосно дизајнирана од вештачка интелигенција и тестирана на луѓе за прв пат.

Вакцината е дизајнирана да делува против сите коронавируси, вклучувајќи ги варијантите на Ковид и вирусите што се пренесуваат од животни на луѓе, со цел да се спречат идни пандемии.

Истражувачите ги анализирале генетските кодови на различни коронавируси и користеле вештачка интелигенција за да создадат супер-антиген што го тренира имунолошкиот систем да го препознава целото семејство на вируси, дури и ако мутираат.

Првите клинички испитувања на 39 лица покажаа дека вакцината е безбедна, додека следната студија на околу 200 испитаници ќе даде појасна слика за нејзината ефикасност, пишува Би-Би-Си.

Професорот Џонатан Хини рече дека ова е фундаментална промена во подготвеноста за пандемија, додека професорот Саул Фауст оцени дека технологијата дефинитивно има потенцијал.

Тимот веќе работи на универзални вакцини против сезонски грип, птичји грип H5N1 и вирусни хеморагични трески, вклучувајќи ги и соевите на ебола за кои сè уште нема вакцина.

Според професорот Енди Полард од Оксфордската група за вакцини, пристапите кон вештачката интелигенција веќе даваат фасцинантни податоци во студиите врз животни, а клучниот тест ќе бидат резултатите во испитувањата врз луѓе.

Научниците веруваат дека вештачката интелигенција би можела да стане пресвртница во развојот на вакцини, забрзувајќи го процесот и спасувајќи животи.