Само неколку дена по календарскиот почеток на метеоролошката есен, Австрија ја зафати првиот краток бран на зимата, барем во повисоките планински предели. На познатите алпски масиви Дахштајнглечер (Dachsteingletscher) и Кицштајнхорн (Kitzsteinhorn) падна нов снег, а мерните станици забележаа и до осум сантиметри снежна покривка.
Управата на скијалиштето на Дахштајн објави фотографии од падините покриени со снег и порача дека се веќе подготвени за „вистински зимски амбиент“.
На Кицштајнхорн во тек се подготовки за почетокот на скијачката сезона, која, според најавите, би требало да започне на 10 октомври, доколку снежните услови тоа го дозволат.
Глечерите Дахштајн и Кицштајнхорн се наоѓаат на надморска височина од 2.995, односно 3.203 метри. Во долините, сепак, нема снег – пониските подрачја ги зафатија слаби врнежи од дожд и магла.
