Тим научници откри прва позната низа од отпечатоци на возрасен *Tyrannosaurus rex* – во должина од околу седум метри – во американската сојузна држава Северна Дакота, објави денес британскиот весник „Гардијан“.
Низата се состои од четири отпечатоци со по три прста, а првпат беше откриена минатата година од истражувачи од Денверскиот музеј за природа и наука во Колорадо и од Универзитетот „Џон Мурс“ во Ливерпул.
Откритието е направено во југозападниот дел на оваа американска сојузна држава, на локалитет со фосили од диносауруси познат како формацијата „Хел Крик“ (Hell Creek Formation).
Наодите, кои сега се објавени во научно списание, датираат од пред 66,5 милиони години и претставуваат прв случај на вакво откритие и идентификација.
Иако претходно биле пронајдени поединечни стапалки или траги што им припаѓале на млади единки или на сродни видови, научниците наведуваат дека ова е првата позната низа од стапалки оставена од возрасен *Tyrannosaurus rex* додека се движел.
„Коските ни кажуваат многу за овие животни, но стапалките доловуваат момент од нивното однесување и преку нив можеме да го следиме движењето на животното низ пределите“, изјави Тајлер Лајсон, куратор за палеонтологија на ‘рбетници во музејот во Денвер.
Секоја стапалка е долга приближно 0,91 метар, а должината на чекорот изнесува околу 3,96 метри.
Истражувачкиот тим користеше 3Д-скенирање на површината со висока резолуција за да ја документира секоја стапалка и да изработи физички 3Д-репродукции. Врз основа на ова истражување, научниците успеаја да направат груба проценка дека животното се движело со брзина од приближно 5,6 до 7,2 километри на час, што е споредливо со брзо човечко одење.
Три од откриените стапалки ќе бидат извадени со хеликоптер подоцна оваа година и транспортирани до музејот во Денвер. *Tyrannosaurus rex*, најпознатиот од сите диносауруси, живеел пред околу 66–68 милиони години за време на периодот креда; високи меѓу 3,6 и 4 метри, овие суштества биле меѓу последните диносауруси што чекореле по Земјата пред масовното изумирање да ги збрише.
