Територијалното прашање останува главна пречка за постигнување договор меѓу Украина и Русија, изјави Џаред Кушнер, специјален пратеник на американскиот претседател Доналд Трамп, на форумот „YES 2026“ во Киев.
„Главното прашање ќе биде територијата. Токму тоа е точката за која страните сè уште немаат постигнато договор. Претседателот (Владимир) Путин ја изнесе својата позиција во однос на она што сака да го постигне. Доколку Украина би била подготвена да се повлече до таа линија, ние веќе ќе ги имавме подготвено и договорено другите услови од спогодбата. Засега, Украина не сака да го стори тоа. Нашата задача како посредници е да утврдиме како да најдеме креативно решение што не е во спротивност со нивните желби и им помага да ја постигнат својата цел, а истовремено ја принудува Русија да го прекине конфликтот, за двете страни да можат да продолжат напред во рамките на систем што ќе спречи повторно да се случи нешто слично“, рече Кушнер.
Според „Укринформ“, Кушнер исто така изјави дека Киев и Москва наводно се соочуваат со „големи страдања“ и се решени да ја завршат војната.
