Статуетката Оскар што рускиот режисер Павел Таланкин, заедно со Дејвид Боренштајн, ја доби за најдобар документарен филм „Господин Никој против Путин“, а која исчезна за време на летот од Њујорк до Франкфурт, е пронајдена.
Ова го потврди германската авиокомпанија „Луфтханза“. Проблемот се појави на аеродромот „Џон Ф. Кенеди“, каде што безбедносните служби проценија дека статуетката може да претставува потенцијален безбедносен ризик, поради што мораше да се пријави како чекиран багаж, објави „Пипл“. По слетувањето во Франкфурт, кутијата во која беше ставен Оскарот не беше пронајдена. „Луфтханза“ соопшти дека статуетката оттогаш е пронајдена и е безбедна, и дека е во контакт со сопственикот за да организира нејзино враќање што е можно поскоро.
Компанијата се извини за инцидентот и започна внатрешна истрага за околностите на исчезнувањето. Во разговор за онлајн списанието „Дедлајн“ по пристигнувањето во Германија во четвртокот, Таланкин, кој избега од Русија во 2024 година, рече дека е „целосно збунувачки што го сметаат „Оскарот“ за оружје“. Тој рече дека го носел трофејот со себе во кабината на претходните летови со различни авиокомпании со кои летал „и никогаш немало никаков проблем“.
Неговиот документарен филм „Господин Никој против Путин“ е базиран на снимки што Таланкин, 35-годишен снимател, ги собрал во училиштето каде што работел во регионот Чељабинск во Русија за да покаже како учениците биле изложени на провоена пропаганда.
Таланкин моментално е во самонаметнат егзил за сопствена безбедност и живее во Европа. Русија го забрани документарецот на три платформи за стриминг бидејќи, како што вели, „шири екстремизам и тероризам“.
