Предизвици без преседан: Договорено најголемо ослободување на нафта од резервите во историјата

Сите 32 земји-членки на Меѓународната агенција за енергетика (ИЕА) едногласно се согласија да стават на располагање на пазарот 400 милиони барели нафта од нивните резерви за итни случаи, како одговор на нарушувањата на пазарите на нафта предизвикани од војната на Блискиот Исток.

Ова е најголемото ослободување на нафта од залихите досега.

Одлуката за преземање заедничка вонредна мерка е донесена по вонредниот  состанок на владите на земјите-членки на ИЕА во вторник, кој го свика извршниот директор на ИЕА за да ја процени состојбата на пазарот во контекст на конфликтот на Блискиот Исток и да разгледа опции за решавање на прекините во снабдувањето.

„Предизвиците со кои се соочуваме на пазарот на нафта се без преседан по својата големина, па затоа сум многу задоволен што земјите-членки на ИЕА одговорија со вонредна заедничка акција од невиден размер“, рече извршниот директор на ИЕА, Фатих Бирол. Пазарите на нафта се глобални, па затоа одговорот на големите нарушувања мора да биде глобален. Енергетската безбедност е фундаментален мандат на ИЕА и ми е мило што членовите на ИЕА покажуваат силна солидарност со заедничко преземање решителни мерки“, потенцира Бирол.

Членките на ИЕА имаат итни залихи од повеќе од 1,2 милијарди барели, со дополнителни 600 милиони барели индустриски залихи што ги чуваат компаниите под владини обврски. Координираното пуштање на залихи на пазарот е шесто во историјата на ИЕА, која е основана во 1974 година. Претходни заеднички интервенции беа спроведени во 1991, 2005, 2011 година и двапати во 2022 година.