Полска бара помош од Франција и Шведска во истрагата за трговија со луѓе поврзана со Епстин

Полска ќе бара информации и докази од Франција и Шведска во својата истрага за трговија со луѓе поврзана со осудениот сексуален престапник Џефри Епстин, соопшти денес полското обвинителство, велејќи дека документите од досиејата на Епстин укажуваат на основано сомневање дека кривични дела се извршени и на полска територија.

Полското обвинителство потврди во соопштение дека започнало истрага за трговија со луѓе, за која се сомнева дека е спроведена помеѓу 2009 и август 2019 година на територијата на Полска и други земји, објави агенцијата „Ројтерс“.

Според обвинителството, станува збор за регрутирање жени и девојки за работа во странство под лажни ветувања, потоа нивно транспортирање надвор од Полска и предавање на трети страни за сексуална експлоатација.

Документите достапни за „Ројтерс“ покажуваат дека маж по име Даниел Сиад го информирал Епстин за неговите патувања низ Полска, Словачка и Чешка во потрага по модели.

Се вели дека тој соработувал со Жан-Луј Брун, клучен осомничен и долгогодишен соработник на Епстин, кој почина во француски затвор во 2022 година.

Полските медиуми објавија дека Сиад е роден во Алжир и се преселил во Шведска на 23-годишна возраст.

Во февруари, шведскиот весник „Експрессен“ го цитираше Сиад како вели дека никогаш не извршил кривично дело и дека е подготвен да разговара со истражители во која било заинтересирана земја.

Истрагата на полското обвинителство е фокусирана и на можните врски на Епштајн со руското разузнавање, како и на можните прекршувања што можеле да влијаат врз полските граѓани, изјави претходно полскиот премиер Доналд Туск.

На 30 јануари, Министерството за правда на САД објави повеќе од 3,5 милиони страници документи, околу 2.000 видеа и 180.000 фотографии во најновата, најобемна серија материјали поврзани со случајот Епстин.

Џефри Епстин беше обвинет во федералниот суд во Менхетен во 2019 година по обвинение за трговија со малолетници за целите на сексуална експлоатација.

Епстин беше пронајден обесен во својата ќелија додека чекаше судење, а неговата смрт официјално беше прогласена за самоубиство.