По бура реакции за снимениот спот „Секси мама“ на косовскиот рапер Дон Џони во „Македониум“, вршителот на должност директор на оваа културна институција Миха Оџаклиески, денеска и официјално поднесе неотповиклива оставка од функцијата од морални причини, откако претходно за медиумите објасни дека одлуката ја донел Управниот одбор. Тој посочи дека одлуката е личен, морален и етички чин и израз на одговорност кон институцијата и кон јавноста. Премиерот Христијан Мицкоски пак, денес им се извини на граѓаните и побара разрешување на директорот и на Управниот одбор. Тој посочи дека музичките спотови не треба да се снимаат во институции како “Македониумот“ во Крушево.
-Тоа што таму се случило претставува нешто што не требало да се случи. Јас ќе побарам од министерот за култура и туризам да биде разрешен директорот на таа институција заедно со Управниот одбор, бидејќи таков тип на институции не треба да бидат изнајмувани и користени за такви намени. Јас им се извинувам на граѓаните поради тоа што тој пропуст е направен и се случил, и ќе се потрудиме во иднина такво нешто да да не се повтори, истакна Мицкоски.
И министерот за култура и туризам Седат Сулејмани, на денешната прес –конференција на прашањето на новинарите за скандалозниот случај кажа дека иако нема конкретни информации и детали, директорите треба да внимаваат за каква намена го издаваат просторот.
-Институциите имаат законско право да изнајмуваат објекти, но директорите треба да внимаваат какви програми ќе се одржуваат и со каква намена, кажа Сулејмани. Тој посочи дека како министер и Министерството за култура се надлежни да ги бранат сите артисти и културни работници, но дека ја разбира чувствителноста на случајот и најавува законски измени доколку е потребно, бидејќи според актуелните законски одредби постои можност за издавање на просторот за одредена сума.
Од страна на медиумите е посочено дека е недолично и неспоиво ваков спот да се снима во објект кој има исклучително историско значење за државата и во кој се наоѓа гробот на претседателот на Крушевската Република, Никола Карев, како и дела на уметниците Борко Лазески и Томе Серафимовски.
Вчера директорот на институцијата во изјава за медиумите кажа дека одлуката ја донел Управниот одбор, но и дека дел од сцените не се снимени во Македониумот. За снимањето на спотот не била запознаена ниту Управата за културно наследство.
Исто така на прес-конференцијата беше поставено и прашањето зошто вакви објекти како „Македониум“ не се дадени во владение на општините да менаџираат со нив, на што министерот Сулејмани одговори дека тоа е регулирано со Закон за децентрализација, но дека работите се одвиваат споро.
– Ова е нов проблем и ние како Министерство за култура сме во процес на добивање на повеќе информации, кажа Сулејмани.
За медиумите вчера беше кажано дека раперот за користењето на објектот платил 500 евра за пет-шест саати.












