По гласањето поради наминувањето на јавниот долг на Словачка: Владата на Фицо доби поддршка од парламентот

Владата на словачкиот премиер Роберт Фицо беше изгласана од парламентот на земјата во понеделник откако беше свикано гласање за надминување на законската граница за јавниот долг.

Владејачката коалиција ја доби поддршката од 78 пратеници во парламентот со 150 места, избегнувајќи пад на владата и потенцијална политичка криза, објави Ројтерс. Словачка, членка на еврозоната, има уставен закон за буџетска одговорност кој предвидува постепени мерки кога јавниот долг се зголемува – од замрзнување на платите на министрите и ограничување на трошењето, до последно средство, гласање за доверба на владата.

Највисокиот праг на долг што бара гласање за доверба на владата постепено се намалува од 60 проценти од бруто домашниот производ (БДП) на 52 проценти до 2025 година, според најновите достапни податоци. Сепак, исклучоците за новоформираните или привремените влади им овозможија на претходните администрации да ги избегнат најстрогите мерки дури и додека долгот растеше, објави „Танјуг“.

Последното ослободување истече на крајот од 2025 година, но владата го одложи гласањето сè додека Уставниот суд во среда не наложи постапката да се спроведе без одложување.

Фицо веднаш го започна гласањето, оценувајќи дека тоа е само формалност. Според официјалните податоци, долгот на Словачка изнесувал 57,9 проценти од БДП во 2024 година, додека во 2025 година се зголемил на 61,4 проценти. Опозицијата процени дека достигнатото ниво на долг требало да предизвика гласање за доверба на крајот од минатата година. Буџетот за оваа година предвидува дефицит од 4,3 проценти од БДП, што малку ќе се намали на 4,2 проценти до 2027 година, додека се очекува долгот да се зголеми на 65,1 процент од БДП следната година.

Фискалниот совет на Словачка предупреди пред гласањето дека гласањето за доверба не треба да се третира како обична формалност. Словачкиот премиер Роберт Фицо вчера објави дека ќе побара гласање за доверба на владата бидејќи јавниот долг на Словачка е над нивото утврдено со фискалните правила дефинирани во словачкиот Устав. Фицо рече дека ја почитува одлуката на Уставниот суд, кој претходно рече дека владата мора да побара гласање за доверба од парламентот без одлагање.

Тој нагласи дека спорот не е околу тоа дали гласањето е потребно, туку дека гласањето за доверба на владата може да се одржи подоцна, кога пратениците ќе дебатираат за следниот буџет.