Пакистан е домаќин на регионален состанок за Иран: Исламабад посредува во решавањето на кризата

Пакистанскиот министер за надворешни работи, Ишак Дар, денес изјави дека земјата ќе биде домаќин на разговори меѓу САД и Иран во наредните денови, со поддршка на регионалните сили за дипломатско решение на кризата на Блискиот Исток.

Дар рече дека и Вашингтон и Техеран изразиле доверба во посредничката улога на Пакистан, но не прецизираше дали разговорите ќе бидат директни или индиректни, ниту пак САД и Иран досега дале какви било изјави за ова прашање, објавува пакистанскиот „Експрес Трибјун“.

Тој ја даде изјавата по состанокот на министрите за надворешни работи на Пакистан, Турција, Саудиска Арабија и Египет во Исламабад, кој, како што оцени, бил „детална и суштинска дискусија“ за моменталната состојба во регионот.

Според него, шефовите на дипломатиите се согласиле дека дијалогот е единствениот одржлив пат кон трајно решение на конфликтот во кој се вклучени САД, Израел и Иран, истовремено предупредувајќи на катастрофални последици за населението и економијата на регионот.

Дар рече дека министрите ги поддржале напорите на Пакистан за намалување на тензиите, спречување на воена ескалација и создавање услови за преговори, и ја нагласиле важноста на единството меѓу муслиманските земји.

„Се согласивме дека оваа војна не е во интерес на ниту една страна и води само кон уништување“, рече Дар, додавајќи дека е потребно да се почитуваат принципите на Повелбата на Обединетите нации, вклучувајќи го суверенитетот и територијалниот интегритет на државите.

Пакистан т стана домаќин на разговори, вклучувајќи претставници од Турција, Египет и Саудиска Арабија, за прекин на војната во Иран, при што почетните разговори се фокусираа на предлозите за повторно отворање на Ормускиот теснец, објави британската новинска агенција „Ројтерс“ на својата веб-страница.

Министрите за надворешни работи на трите регионални сили се состанаа во Исламабад, додека Иран ги предупреди САД да не започнат копнена офанзива, а глобалните цени на нафтата се зголемија.

Претставниците на земјите собрани во Пакистан поднесоа предлози до Вашингтон за поморскиот сообраќај и повторното отворање на Ормускиот теснец, изјавија за „Ројтерс“ извори блиски до разговорите, пренесе „Бета“.

Околу 20 проценти од глобалните резерви на нафта и течен природен гас претходно минуваа низ Ормускиот теснец, но Иран го блокираше преминот како одговор на воздушните напади на САД и Израел.

Пакистан, кој дели граница со Иран со Турција, ги искористи своите блиски врски со Техеран и Вашингтон за да се позиционира како клучен дипломатски канал во конфликтот, додека Анкара и Каиро исто така се обидуваат да играат улога на посредник.

Пакистанскиот извор рече дека предлозите, особено од Египет, биле доставени до Белата куќа пред состанокот и вклучуваат тарифни структури моделирани според Суецкиот канал.

Два други пакистански извори рекоа дека Турција, Египет и Саудиска Арабија би можеле да формираат конзорциум за управување со протокот на нафта низ Ормускиот теснец и побарале од Пакистан да учествува.