Огнот кај Чаниште сè уште активен, прекинат кракот кон селото Крушевица

Пожарот кај селото Чаниште, Прилепско,  и понатаму создава тешкотии, но според директорот на Дирекцијата за заштита и спасување (ДЗС), Стојанче Ангелов, селото е безбедно.

Тој истакна дека нема активен крак кон селото Крушевица.

– Има еден активен крак кон селото Орле – Битолско, со кој се борат битолските пожарникари. Таму е ангажиран булдожер кој прави противпожарна пресека. Од страната на селата Чаниште и Крушевица работат прилепските пожарникари помогнати од специјални тимови на ДЗС, огнени тимови со 4 пинцгауери и повеќе тимови на ДЗС составени од доброволни пожарникари од Битола, Кочани и Виница – изјави Ангелов.

Наведе дека многу помогнал и полицискиот хеликоптер. Според Ангелов, спасени се неколку манастири, неколку трла и еден пчеларник.

Исто така, информираше дека е активен и пожарот кај Студеничани кој, како што наведе, повеќе чади, отколку што гори, но и пожарот на територијата на Општина Македонски Брод, каде што ветрот претставувал проблем во неговото гаснење.

Тој повторно ги повика граѓаните да внимаваат, бидејќи како што нагласи, доволна е една искра за да се случи катастрофа.

На територијата на државата, денеска, до 13:00 часот, биле регистрирани вкупно 8 пожари на отворен простор, од кои 4 се активни, 2 се под контрола, а 2 се изгаснати.

Активни се пожарите во селата Моране, Вртекица и Рамни Габер – Општина Студеничани, каде што гори мешана шума, во местото викано Видуш, кај селото Драгов Дол и кај селото Локвица – Општина Македонски Брод, каде што горат ниска вегетација, нискостеблеста шума и грмушки. Потоа, во селото Чаниште, крак кон селото Крушевица, селото Лопатица, крак кон Црна Река и крак кон селото Орле – Општина Новаци, каде што гори ниска вегетација, а активен е и пожарот на депонијата Буково – Општина Охрид, каде што гори ѓубре.

Под контрола се пожарите во селото Копанце – Општина Јегуновце, каде  што гори мешана шума и на депонијата во Делчево. Изгаснати се пожарите во селото Рашче – Општина Сарај и во селото Просениково – Општина Струмица.

(А. П.)