Одржан првиот состанок на меѓуресорската група за подготовка на националната стратегија за развој на спортот

Во Министерството за спорт се одржа првиот работен состанок на меѓуресорската група за подготовка на националната стратегија за развој на спортот (2026-2030). На состанокот присуствуваа: државниот секретар во Министерството за спорт, Сашо Огњеновски; Тања Блажевска, раководител на Одделението за оперативно-аналитички работи во Секторот за спорт и координатор на работната група; Игорче Кузмановски, раководител на Одделението за развој и унапредување на спортскиот систем; членови и заменици-членови; претставници на повеќе институции што се вклучени во подготовката на стратегијата – Генералниот секретаријат на Владата на Република Македонија, Министерството за образование и наука, Министерството за култура и туризам, Министерството за надворешни работи и надворешна трговија, Министерството за социјална политика, демографија и млади, Министерството за внатрешни работи, Министерството за финансии, Министерството за транспорт, како и претставници од Државното правобранителство.

На првата работна средба беше истакната важноста на овој стратешки документ за развојот на спортот како еден од националните приоритети на Владата на Република Македонија.

– Спортот е специфична сфера што директно или индиректно е поврзана со многу други области. Изготвувањето на националната стратегија за развој на спортот е комплексен процес во кој ќе бидат вклучени сите релевантни страни: државни институции, национални спортски федерации, универзитетски професори и други стручни лица од областа на спортот, кои верувам ќе дадат голем придонес во изготвувањето на овој стратешки документ во предвидениот рок – рече државниот секретар, Сашо Огњеновски.