Еден брод потона, друг беше погоден од три дрона, а Бугарија покрена истрага
Бугарскиот премиер Румен Радев денеска соопшти дека се регистрирани нови напади со дронови врз бродови во Црното Море, оценувајќи ги таквите напади во непосредна близина на бугарските територијални води како „апсолутно неприфатливи“.
Радев изјави дека е свикан итен состанок на Советот за безбедност на бугарската влада; за време на состанокот биле добиени информации за уште еден брод – лоциран на 17 наутички милји источно од Крапец – кој бил погоден и потоа потонал, при што еден член на екипажот бил спасен.
Претходно, во 1:30 часот по полноќ, бил примен повик за помош од брод лоциран на 18 наутички милји источно од Бјала. Според информациите што екипажот ги доставил до Центарот за поморско спасување во Варна, бродот бил погоден од три воздушни дрона во пределот на палубата и трупот, пренесува бугарската новинска агенција БТА.
Бугарските служби за спасување и граничната полиција ги евакуирале сите 15 членови на екипажот од бродот „Челзи 3“ (Chelsea 3), кој плови под малтешко знаме, е регистриран во Одеса и е во украинска сопственост. Екипажот се состои од седум украински и осум азербејџански државјани.
Според Радев, екипажот бил пренесен во пристаништето во Варна, а пет члена добиле медицинска помош поради полесни повреди.
Бугарскиот премиер изјави дека постојаните претставници на Бугарија во НАТО и во Европската Унија биле информирани за инцидентите и дека очекува да разговара со генералниот секретар на НАТО, Марк Руте.
„Бугарија побара поддршка во истрагата за нападите врз три брода со цел со сигурност да се утврди земјата на потекло на дроновите што ги погодуваат пловилата во непосредна близина на бугарските територијални води“, рече Радев.
Тој додаде дека Бугарија ќе продолжи да бара помош за зајакнување на воздушниот и поморскиот надзор, како и за подобрување на сопствените капацитети за одговор.
„Не располагаме со конкретни и јасни докази за да покренеме обвиненија против која било од страните, но логиката – како што веќе изјавив – сугерира дека исходот ѝ оди во прилог на Руската Федерација“, рече Радев, додавајќи дека поради тоа ќе ја повика на разговор руската амбасадорка во Бугарија, Елеонора Митрофанова.
