Новак Ѓоковиќ е ангел или демон?

Додека Новак Ѓоковиќ се подготвува да се врати на теренот и да настапи на Мастерсот во Рим, кој служи како клучен предговор за Ролан Гарос, вниманието на светските медиуми е насочено кон неговиот поранешен соработник Пепе Имаз.

На Мастерсот во Мадрид, кој го пропуштија и Новак и Карлос Алкараз, Имаз се појави во друштво на братот на Новак, Марко, промовирајќи ја нивната организација „Љубов и мир“.

Имаз нагласи дека Марко Ѓоковиќ, на кого му помогнал во борбата против депресијата во 2013 година, станал негов неразделен соработник, и токму преку него ја започнал својата соработка со најдобриот тенисер во светот на сите времиња.

Во интервју за шпанскиот „Мундо Депортиво“, Имаз се обиде да ја објасни сложената природа на карактерот на Новак, одговарајќи на прашањето дали српскиот ас е „ангел или демон“.

„Новак е ангел, иако го има и тој гнев, таа друга страна од неговиот карактер што понекогаш ни е тешко да ја разбереме, но тој доаѓа од земја каде што животот не беше онаков каков што ние сме го растеле“.

Имаз верува дека клучот за разбирање на повремените реакции на Новак на теренот лежи во траумите од детството што ја обликувале неговата психа.

„Тој порасна во земја каде што имаше бомбардирање. Марко ми кажа, исто како Новак, како било кога ќе се огласела сирената, кога морало да бегаш и да се скриеш. Дури и сега, кога ќе чуе сирена, тој трепери. Тоа е во него. Затоа за мене, она што го направи Новак вреди двојно почитување. Бидејќи кога знаете од каде започнал и каде стигнал, каква рамнотежа нашол, тоа има двојна вредност.“

Иако емоционалните испади на Новак на теренот често се предмет на критика, Имаз верува дека тие се составен дел од неговото патување и механизам што му овозможува да се справи со притисокот на спортот од врвно ниво. Сепак, тој го нагласува моралниот развој и хуманоста на Новак.

„Дали има испади на гнев? Има. Дали би било подобро да ги немаше? Ќе беше, но ги има. Тоа е нешто што му дава можност да продолжи да игра. Она што би го нагласил е неговиот внатрешен и морален раст. Тој е фантастичен човек, секогаш подготвен да помогне.“

И покрај тоа што Новак е во доцните четириесетти години, Имаз не е изненаден од неговата долговечност во професионалниот тенис, нагласувајќи дека српскиот тенисер ја пронашол совршената рамнотежа помеѓу физичките способности и љубовта кон играта.

„Не ме изненадува што сè уште игра. Додека се чувствува добро, ќе игра затоа што го сака тоа. Пронашол хармонија во спортот што го тренира уште од дете. Го кажал тоа многу пати. Додека има физичка способност, како што има сега, ќе игра. Секако, тоа не е истата способност како пред десет години, но има речиси 40 години, а погледнете го неговиот капацитет“, изјави Пепе Имаз за Мундо Депортиво.