Ноември стартува со временски шок: Чубрило најави метеоролошки пресврт на Балканот

Од утре, балканскиот регион ќе биде под влијание на секундарен циклон кој ќе донесе вистински есенски услови, пообилни врнежи од дожд и забележителен пад на температурата со снег на планините, вели метеорологот Марко Чубрило во својата најнова прогноза.

Според неговите пресметки, студениот воздух од север се спушта кон Медитеранот, каде што преку ноќ над јужна Италија ќе се формира секундарен циклон и до среда ќе се движи преку Јонското Море кон источна Грција. Затоа, се очекува наредните денови да бидат претежно облачни и релативно студени со повремени врнежи од дожд.

Најголеми врнежи од дожд се прогнозираат за источна Србија, каде локално би можеле да наврнат околу 70 милиметри дожд на квадратен метар. Во другите делови на Србија, источна Хрватска, централна и источна Босна и Херцеговина, како и поголемиот дел од Црна Гора, се очекуваат помеѓу 15 и 35 милиметри врнежи од дожд. На крајниот запад од регионот, влијанието на циклонот ќе биде послабо, додека до 80 милиметри дожд би можеле да наврнат во внатрешноста на јужниот Јадран.

Снег и бурен ветер
Според временската прогноза, границата на снегот ќе се спушти до околу 800 метри надморска височина, додека се очекува пообилен снег над 900 метри. Планините на југозападна и западна Србија, северна Црна Гора, како и источна и централна Босна и Херцеговина би можеле да добијат снежна покривка од 10 до 30 сантиметри. Промените на времето ќе бидат придружени и со зголемени ветрови – силен и бурен ветер ќе дува по поголемиот дел од јадранскиот брег.

Дневните температури ќе се движат од 4 до 10 степени Целзиусови во првата половина од неделата. Стабилизација и претежно суво време се очекува од среда, но со многу студени ноќи и први утрински мразови во низините. Минималните температури ќе се движат од -4 до 4 степени, додека дневните максимуми ќе се движат помеѓу 5 и 12 степени, што е во рамките на просекот за почетокот на ноември.

Чубрило истакнува дека, по долга низа години, првата половина на ноември конечно ќе донесе нормално есенско време. Сепак, развојот на ситуацијата во втората половина од месецот е сè уште под знак прашалник, бидејќи околу 13 ноември, над Европа би можел да се случи сериозен конфликт помеѓу релативно топол југозападен и ладен северен воздушен тек.