Навивачите на СП 2026 година се соочуваат со астрономски цени за паркирање

Доколку навивачите од Соединетите Американски Држави и низ целиот свет продолжат да протестираат против превисоките цени на билетите за Светското првенство во 2026 година, новите детали за дополнителните трошоци би можеле дополнително да го разгорат нивното незадоволство. Со оглед на тоа што цените на билетите достигнуваат стотици долари дури и за најевтините седишта во групната фаза, сега се чини дека во земја со ограничен јавен превоз, паркирањето ќе биде астрономско, понекогаш надминувајќи ја цената на самиот билет.

Според „Атлетик“, ФИФА продава паркинг места за натпревари на стадионот „СоФи“ во Лос Анџелес за 250 до 300 долари по возило дневно. Проблемот е усложнет од фактот дека паркинг местата, рекламирани на „Официјалната страница за паркирање на СП 2026“ на ФИФА, се наоѓаат на повеќе од една милја од самиот стадион.

Осум натпревари ќе се играат на стадионот „СоФи“, а највисоката цена од 300 долари важи за паркинг место за првиот натпревар на репрезентацијата на САД и за еден четвртфинален натпревар.

Во изјава за „Атлетик“, портпарол на ФИФА ги оправда високите цени. „Цените за паркирање се одредуваат врз основа на условите на локалниот пазар и се споредуваат со слични големи настани претходно одржани во секој град домаќин“.

Тоа оправдување не се совпаѓа со вистинските цени за натпреварите што вообичаено се играат на стадионот „СоФи“, дом на Лос Анџелес Чарџерс и Лос Анџелес Ремс од НФЛ. Во непосредна близина се наоѓа „Интуит Доум“, салата каде што играат Лос Анџелес Клиперс.

Паркинг местата од 300 долари за натпреварот на САД се наоѓаат веднаш до „Интуит Доум“, во гаража оддалечена 21 минута пешачење од стадионот. За натпреварите од регуларната сезона на НБА, паркирањето во истата гаража чини 56,50 долари, додека за претстојниот натпревар на НБА Ол-стар, цената ќе биде 88 долари.

За споредба, цената за натпреварите на „Ремс“ на паркинзите веднаш до стадионот „СоФи“ се 71 долар по натпревар. Овие паркинзи, според „Атлетик“, веројатно нема да бидат достапни за навивачите за време на Светското првенство бидејќи ќе бидат лоцирани во рамките на безбедносен периметар.

Иако Лос Анџелес се издвојува по своите највисоки цени, и другите градови домаќини имаат високи цени. Во Филаделфија, цените исто така достигнуваат стотици долари, додека во Атланта тие варираат во зависност од натпреварот, од 75 долари за натпреварот Шпанија-Зелен ’Рт до 200 долари за полуфиналето.

На некои локации, како што се стадионот „Жилет“ вод Бостон и стадионот Хард Рок во Мајами, паркинг местата се веќе „распродадени“. Од друга страна, градови како Хјустон, Сан Франциско, Сиетл и Њујорк/Њу Џерси сè уште не почнале да ги продаваат.

Во исто време, се развива „секундарен пазар“, каде што навивачите кои успеале да купат паркинг карти сега ги препродаваат по уште повисоки цени.