На „Сантијаго Бернабеу“ ќе се игра тенис

Фудбалскиот стадион „Сантијаго Бернабеу“ ќе добие ново лице, а на него  наместо фудбал ќе се тренира тенис, и тоа пред Мастерсот во Мадрид.

Челниците на Реал Мадрид решија да го искористат периодот во кој првиот тим нема да игра дома и да го претворат стадионот во привремен центар за тренинг на земјена подлога за врвни тенисери.

На крајот на април, „Кралскиот клуб“ ќе има три врзани гостувања, па стадионот ќе остане неискористен неколку дена по дуелот со Алвес.

Наместо просторот да биде празен, донесена е одлука да се создаде ексклузивна база за подготовка на учесниците на еден од најголемите турнири на земјена подлога. Самите натпревари нема да се играат на „Бернабеу“.

Главниот дел од турнирот сè уште останува резервиран за „Маѓичната кутија“, која, како и досега, ќе биде домаќин на сите АТП и ВТА натпревари од 22 април до 3 мај.

Новите терени на „Бернабеу“ ќе се користат исклучиво за тренинг, а ќе им обезбедат на играчите помирни и полуксузни услови во споредба со стандардните терени во комплексот „Маѓична кутија“, кои често се преоптоварени за време на турнирите.

Овој потег дополнително ја потврдува трансформацијата на стадионот по неодамнешното реновирање, кое му даде на Реал Мадрид мултифункционален објект способен да биде домаќин на разни големи настани – од спортски спектакли до други масовни настани, со одредени ограничувања кога станува збор за концерти.