Во рамки на континуираните активности за подобрување на инфраструктурата, во Општина Кавадарци се спроведува редовно одржување и модернизација на системот за улично осветлување, со цел зголемена безбедност и подобри услови за движење на граѓаните во вечерните часови.
Во таа насока, поставени се нови светилки на потегот кој води од ЈП „Комуналец“ Кавадарци кон објектот на ДИК „Страшо Пинџур“, инаку клучна градска делница.
– Со оваа интервенција значително се подобрува видливоста на оваа делница, која е фреквентна и често користена од пешаци и возила – велат од Општина Кавадарци.
Оттаму истакнуваат дека целта на ваквите активности е да се создаде побезбедна урбана средина, да се намали ризикот од незгоди во ноќните часови и да се подобри целокупниот квалитет на јавната инфраструктура.
– Модернизацијата на уличното осветлување е дел од поширок план за уредување и унапредување на јавните површини во градот, кој се реализира постепено во повеќе делови од општината – заклучија општинските власти.
